പേട്ട: രാജ്യാന്തര വിമാനത്താവളത്തിലെ വയര്ലസ് സ്റ്റേഷനില് സുരക്ഷാ പാളിച്ചയൊരുക്കി വിരമിക്കല് ആഘോഷം. വിമാനത്താവളത്തിലെ എയര് ട്രാഫിക് കണ്ട്രോള് ജീവനക്കാരനായ യേശുദാസിന്റെ റിട്ടയര്മെന്റിനോടനുബന്ധിച്ച് സഹജീവനക്കാര്ക്ക് വേണ്ടി നടത്തിയ പാര്ട്ടിയാണ് വയര്ലസ് സ്റ്റേഷനില് മദ്യപന്മാരുടെ ആഘോഷമായി മാറിയത്.
കഴിഞ്ഞ മാസം 19ന് വൈകീട്ടോടെയാണ് ഇവിടെ ആഘോഷം നടന്നത്. എയര്പോര്ട്ട് അതോറിറ്റിയിലെ ഉന്നതാധികാരികളും സഹജീവനക്കാര്ക്കും പുറമെ പുറത്തു നിന്നുള്ള ഇവരുടെ ഇഷ്ടക്കാരും പങ്കെടുത്തിരുന്നുവെന്നാണ് അറിയുന്നത്. വിമാനത്താവളത്തിലെ റഡാര് സംവിധാനങ്ങള് ഉള്പ്പെടെയുള്ള വയര്ലസ് നെറ്റ്വര്ക്കുകള് നിയന്ത്രിക്കുന്ന തിരുവനന്തപുരത്തെ ഏക സ്ഥാപനമെന്നതിലുപരി സൈന്യത്തിന്റെ സുരക്ഷാപരിധിയില്പ്പെടുന്ന സ്ഥാപനവുമാണിത്. ഉന്നതാധികാരികളുടെ ഔദ്യോഗിക സന്ദര്ശനത്തിനും സ്ഥാപനത്തിലെ ജീവനക്കാര്ക്കും മാത്രമാണ് വയര്ലസ് സ്റ്റേഷനില് പ്രവേശനാനുമതിയുള്ളത്. സുരക്ഷാ ക്രമീകരണങ്ങളെയും അട്ടിമറിച്ച് രഹസ്യ പാര്ട്ടി നടത്തിയെന്നുള്ളതാണ് വസ്തുത. എയര്പോര്ട്ട് അതോറിറ്റിയുമായി ബന്ധപ്പെട്ടവരുടെ ഒത്താശയും ഇക്കാര്യത്തിലുള്ളതിനാലാണ് മദ്യപന്മാരുടെ സംഘം സുരക്ഷാമേഖലയില് കടന്നുകയറിയത്. പിറ്റേന്ന് പുലര്ച്ചെ മൂന്നുമണിയോടെ കൊച്ചുവേളി ഇംഗ്ലീഷ് ഇന്ത്യന് ക്ലെയ്സിന് സമീപത്ത് ചെളിയില് പുതഞ്ഞുകിടന്ന ഡയറക്ടറുടെ കാറില് നിന്ന് മദ്യപിച്ച് അബോധാവസ്ഥയിലായ നിലയില് ഡ്രൈവര് ഒരുവാതില്കോട്ട സ്വദേശി ജയനെ പേട്ട പോലീസ് കസ്റ്റഡിയിലെടുത്തിരുന്നു. വൈദ്യപരിശോധന കഴിഞ്ഞ ഇയാളെ ഡയറക്ടര് ജാമ്യത്തിലിറക്കി. എന്നാല് മദ്യപിച്ച് വാഹനമോടിച്ചതിന് ഡ്രൈവര്ക്കെതിരെ നടപടിയെടുക്കാന് ഡയറക്ടര് തയ്യാറായില്ല.
