എരുമേലി: ശബരിമല തീര്ത്ഥാടനത്തിന്റെ ആചാരാനുഷ്ടാനങ്ങളുടെ ഭാഗമായി പേട്ടതുള്ളല് നടക്കുന്ന എരുമേലിയിലെ പാതയിലെ വാഹന ഗതാഗതം പൂര്ണ്ണമായും ഒഴിവാക്കണമെന്ന് ജില്ലാ കളക്ടര് യു.വി. ജോസ്.എരുമേലിയില് വിവിധ വകുപ്പുകളുടെ തീര്ത്ഥാടക ക്രമീകരണ യോഗത്തില് നടന്ന ചര്ച്ചയില് സംസാരിക്കുകയായിരുന്നു അദ്ദേഹം.
തീര്ത്ഥാടനവുമായി ബന്ധപ്പെട്ട് എരുമേലിയില് നടത്തിയ പരിശോധനയില് പേട്ടതുള്ളല് പാത വാഹനമുക്തമാക്കണമെന്ന് മനസ്സിലായി. വളരെ ഭീതിയോടെയാണ് പതിനായിരക്കണക്കിന് തീര്ത്ഥാടകര് പേട്ടതുള്ളുന്നത്. അപകടകരമായ അവസ്ഥ ഒഴിവാക്കണമെങ്കില് വാഹനങ്ങള് പൂര്ണ്ണമായും ഒഴിവാക്കമെന്നും കളക്ടര് പറഞ്ഞു.
പേട്ടതുള്ളല് പാതിയിലെ വാഹനങ്ങള് ഒഴിവാക്കാന് ടൗണില് മറ്റൊരു റോഡ് കൂടിവരണം. എന്നാല് ഇതുസംബന്ധിച്ച് മറ്റുവിവരങ്ങള് പറയാന് കളക്ടര് തയ്യാറായില്ല. പാത വാഹനവിമുക്തമാക്കുന്നതിനായി ഗൂഗിള് മാപ്പിലൂടെ ചിത്രങ്ങളെടുത്ത് ടൗണ് പ്ലാനിംഗിന്റെ രേഖകള് തയ്യാറാക്കാന് നാലംഗ സംഘത്തെ ചുമതലപ്പെടുത്തിയതായും കളക്ടര് പറഞ്ഞു.
പേട്ടതുള്ളല് പാത വാഹന വിമുക്തമാക്കണമെന്നാവശ്യപ്പെട്ട് ഹൈന്ദവ സംഘടനകള് നടത്തുന്ന സമരങ്ങളുടെ വിജയമാണ് പുതിയ പദ്ധതിയിലൂടെ വ്യക്തമാകുന്നത്. ബിജെപി ഈ ആവശ്യം ഉന്നയിച്ച് നിരന്തരം സമരം നടത്തിയിരുന്നു. ഹൈന്ദവ സംഘടനകളുടെ ശക്തമായ എതിര്പ്പിനെ തുടര്ന്ന് പേട്ടതുള്ളല് പാത വണ്വേ സംവിധാനത്തിലാക്കാന് കഴിഞ്ഞ വര്ഷമാണ് പോലീസ് നടപടി സ്വീകരിച്ചത്. പേട്ടതുള്ളല് പാത വാഹനവിമുക്തമാക്കുന്നതു സംബന്ധിച്ച് ഗൗരവമായ നടപടികള് നടക്കുകയാണെങ്കിലും കൂടുതല് ചര്ച്ചകള് വേണ്ടിവരുമെന്ന് കളക്ടര് പറഞ്ഞു.
