കൊച്ചി : ‘സൗദി അറേബ്യയില് പന്നിയിറച്ചി ലഭിക്കുന്ന ഹോട്ടല് തുടങ്ങുകയാണ് വേടന്റെ ലക്ഷ്യം’ എന്ന നിലയില് പ്രചരിക്കുന്ന വാര്ത്ത ശരിയല്ലെന്ന് റാപ്പര് വേടന്. സാധാരണ ഇത്തരം കാര്യങ്ങള്ക്ക് മറുപടി പറയാറില്ല, എന്നാല് ഇത്തവണ പറയാതെ വയ്യ എന്ന് തുടങ്ങുന്ന ഇന്സ്റ്റഗ്രാം കുറിപ്പിലാണ് ഇക്കാര്യം വ്യക്തമാക്കിയത്.
‘സൗദി അറേബ്യയില് പന്നിയിറച്ചി വിഭവങ്ങള് വിളമ്പുന്ന ഒരു റെസ്റ്റോറന്റ് ചെയിന് ഞാന് തുടങ്ങാന് പോകുന്നു എന്ന് ചില പോസ്റ്റുകളിലൂടെ പ്രചരിക്കുന്നുണ്ട്. ഇത് പൂര്ണ്ണമായും കള്ളമാണ്. ഇങ്ങനെ ഒരു പ്രസ്താവന ഞാന് ഒരിക്കലും നടത്തിയിട്ടില്ല. സൗദി അറേബ്യയിലോ മറ്റേതെങ്കിലും ഗള്ഫ് രാജ്യത്തോ ഒരു ഹോട്ടലോ റെസ്റ്റോറന്റോ ഭക്ഷണ ബിസിനസ്സോ തുടങ്ങാന് യാതൊരു പദ്ധതിയുമില്ല. അതുമായി ബന്ധപ്പെട്ട് കമ്പനിയോ പങ്കാളിയോ അപേക്ഷയോ ഒന്നും തന്നെ എനിക്കില്ല. ഞാന് സൗദിയിലേക്ക് പോകുന്നത് ഒരു പെര്ഫോമിംഗ് ആര്ട്ടിസ്റ്റ് എന്ന നിലയില്, പരിപാടി സംഘാടകരുടെ ക്ഷണപ്രകാരമാണ്. എന്നെ ക്ഷണിക്കുന്ന ഓരോ രാജ്യത്തിന്റെയും നിയമങ്ങളെയും വിശ്വാസങ്ങളെയും ആചാരങ്ങളെയും ഞാന് എന്നും ബഹുമാനിച്ചിട്ടുണ്ട്. അതിന് വിരുദ്ധമായി ആരെയെങ്കിലും തെറ്റിദ്ധരിപ്പിക്കുന്ന ഒരു പ്രവൃത്തി ഞാന് ഇതുവരെ ചെയ്തിട്ടില്ല’. വേടന് ഇന്സ്റ്റഗ്രാമിലെ പോസ്റ്റില് വ്യക്തമാക്കി. തനിക്കെതിരെ സമൂഹമാധ്യമങ്ങളില് പ്രചരിക്കുന്ന വാര്ത്തയില് നിയമ നടപടി സ്വീകരിക്കുമെന്നും വേടന് ഭീഷണി മുഴക്കി.
സൗദി അറേബ്യയില് പന്നിയിറച്ചി റെസ്റ്റോറന്റ് തുടങ്ങുന്നില്ലെന്ന് റാപ്പര് വേടന്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.