കാഞ്ഞിരപ്പള്ളി: മിനി സിവില് സ്റ്റേഷനില് വെള്ളമില്ല. ഉദ്യോഗസ്ഥര് പെന് ഡൗണ് സമരത്തിനൊരുങ്ങുന്നു. ഇതിന് മുന്നോടിയായി സിവില് സ്റ്റേഷനിലെ വിവിധ സര്ക്കാര് ഓഫിസുകളില് ജോലി ചെയ്യുന്ന വനിതാ ഉദ്യോഗസ്ഥര് ചേര്ന്ന് സിവില് സ്റ്റേഷനില് തന്നെ പ്രവര്ത്തിക്കുന്ന പൊതുമരാമത്ത് കെട്ടിട വിഭാഗം അസിസ്റ്റന്റ് എക്സിക്യൂട്ടീവ് എന്ജിനിയറെ നേരില് കണ്ട് പരാതി ബോധിപ്പിച്ചു. അഞ്ചു നിലകളിലായി പ്രവര്ത്തിക്കുന്ന സിവില് സ്റ്റേഷനില് 23 സര്ക്കാര് കാര്യാലയങ്ങളാണ് പ്രവര്ത്തിക്കുന്നത്. മൂന്നുറുലധികം ജീവനക്കാരാണ് ഇവിടെ ജോലി ചെയ്യുന്നത്.കൂടാതെ നൂറുകണക്കിന് പൊതുജനങ്ങളാണ് വിവിധ ആവശ്യങ്ങള്ക്കായി ദിവസവും സിവില് സ്റ്റേഷനില് എത്തുന്നത്.
സിവില് സ്റ്റേഷനിലേക്ക് വെള്ളമെത്തിക്കാന് ജല സ്രോതസുകളൊന്നുമില്ല, സിവില് സ്റ്റേഷന് വളപ്പിലെ മഴ വെള്ള സംഭരണി മാത്രമാണ് ഏക ആശ്രയം. മഴയില്ലാത്തപ്പോള് സംഭരണി കാലിയാണ്. തുള്ളി വെള്ളമില്ലാത്തതിനാല് പ്രാഥമികാവശ്യങ്ങള്ക്കു പോലും ജീവനക്കാര് കുപ്പി വെള്ളം ഉപയോഗിക്കേണ്ട ഗതികേടിലാണ്.
മൂത്രപ്പുരകളില് നിന്ന് ദുര്ഗന്ധം വമിക്കുന്നതിനാല് ഇവ ഉപയോഗ യോഗ്യമല്ലാതായി. സിവില് സ്റ്റേഷന് നിര്മ്മിച്ച് വര്ഷങ്ങള് കഴിഞ്ഞിട്ടും വെള്ളമെത്തിക്കാന് നടപടി സ്വീകരിക്കാത്തതില് പ്രതിഷേധം ശക്തമാണ്. കഴിഞ്ഞ ദിവസം വനിതാ ജീവനക്കാര് ഒന്നടങ്കമാണ് കെട്ടിടം നിര്മ്മിച്ച പൊതുമരാമത്ത് കെട്ടിട വിഭാഗത്തിലെ ഉദ്യോഗസ്ഥരെ കണ്ട് പരാതി അറിയിച്ചത്. ഇനിയും നടപടിയുണ്ടാകാത്ത പക്ഷം യൂണിയന് ഭേദമന്യേ ജോലി ബഹിഷ്കരണം ഉള്പ്പെടെയുള്ള ശക്തമായ സമര പരിപാടികള് സംഘടിപ്പിക്കാനാണ് ജീവനക്കാരുടെ തീരുമാനം.
