കൊച്ചി: ഫിഷറീസ് മേഖലയില് പ്രാഗല്ഭ്യം തെളിയിച്ചവര്ക്കായി കേരള ഫിഷറീസ് സമുദ്രപഠന സര്വകലാശാല (കുഫോസ്) ഏര്പ്പെടുത്തിയ 2015-ലെ ഫിഷറീസ് പുരസ്കാരങ്ങള് പ്രഖ്യാപിച്ചു. കുഫോസ് രൂപീകരിച്ചതിന് ശേഷം നല്കുന്ന മൂന്നാമത്തെ ഫിഷറീസ് പുരസ്കാരമാണിത്. മികച്ച പമ്പരാഗത മത്സ്യത്തൊഴിലാളിക്കുള്ള പുരസ്കാരം ജില്ലയിലെ എടവനക്കാട് സ്വദേശി കെ.എ. പൈലി കണക്കശ്ശേരിക്ക് ലഭിച്ചു. പഴങ്ങാട് സൊസൈറ്റി അംഗമായ പൈലി പൂങ്കാവനം മത്സ്യബന്ധന സംഘത്തിന്റെ ലീഡറാണ്.
മത്സ്യകൂടുകൃഷിയിലൂടെ മികവ് തെളിയിച്ച പുത്തന്വേലിക്കരയിലെ തിരുത്തിപ്പുറം സ്വദേശി ജെന്സണ് പി.ഡി. യാണ് മികച്ച മത്സ്യകര്ഷകന്. മികച്ച ഫിഷറീസ് ശാസത്രജ്ഞന് പുരസ്കാരം ദേശീയ കാര്ഷിക ഗവേഷണ കൗണ്സില് (ഐസിഎആര്) മുന് ഡെപ്യൂട്ടി ഡയറക്ടര് ജനറല് ഡോ കെ ഗോപകുമാറിന് ലഭിച്ചു. കുഫോസില് പ്രൊഫസര് ഓഫ് എമിനന്സ് ആണ് ഇപ്പോള് ഡോ കെ ഗോപകുമാര്. കുഫോസിലെ എംഎഫ്എസ്സി വിദ്യാര്ത്ഥിയായിരുന്ന ശാലിനി ഗോപിയാണ് മികച്ച ഫിഷറീസ് വിദ്യാര്ത്ഥി. കുഫോസില് ഇന്ന് നടക്കുന്ന ഫിഷറീസ് ദിനാഘോഷ പരിപാടിയില് രാവിലെ 10 മണിക്ക് മന്ത്രി കെ ബാബു പുരസ്കാരങ്ങള് വിതരണം ചെയ്യും.
