കൊച്ചി: അഴിമതി പൂര്ണമായും ഇല്ലാതാക്കാനാകില്ലെന്നും നിയന്ത്രിക്കാന് മാത്രമേ സാധിക്കുവെന്നും മേയര് സൗമിനി ജയിന്. എറണാകുളം പ്രസ് ക്ലബ്ബിന്റെ മുഖാമുഖം പരിപാടിയില് മുന് ഭരണ സമിതിയുടെ അഴിമതിയെക്കുറിച്ചുള്ള ചോദ്യത്തിന് മറുപടി പറയുകയായിരുന്നു മേയര്. ഇ ഗവേണന്സ് പൂര്ത്തിയായാല് അഴിമതി ഒരു പരിധി വരെ തടയാന് സാധിക്കും.
സ്മാര്ട്ട്സിറ്റി പദ്ധതിക്കാണ് ഇത്തവണത്തെ ഭരണ സമിതി ഏറ്റവും കൂടുതല് പ്രാധാന്യം നല്കുന്നത്. വെള്ളക്കെട്ട് രഹിത നഗരം എന്ന ലക്ഷ്യത്തോടെ മുഴുവന് കനാലുകളും കാനകളും പുനര് നിര്മ്മിക്കും. ഇതിനായി മാസ്റ്റര്പ്ലാന് തയ്യാറാക്കും. ഭവന രഹിതര്ക്ക് വീട്, നഗരത്തില് വന്നുപോകുന്ന സ്ത്രീകള്ക്കായി ടോയ്ലറ്റ് സംവിധാനം എന്നിവയും നടപ്പാക്കും. ബ്രഹ്മപുരത്ത് മാലിന്യത്തില് നിന്ന് ഊര്ജ്ജം ഉല്പ്പാദിപ്പിക്കുന്ന പദ്ധതിക്ക് അനുമതി ലഭിച്ചിട്ടുണ്ട്. ഇതിനുള്ള പ്ലാന്റ് നിര്മാണം ഒരുവര്ഷത്തിനുള്ളില് ആരംഭിക്കും. കവചിത വാഹനങ്ങള് ഉപയോഗിച്ച് മാത്രമായിരിക്കും മാലിന്യം നീക്കം ചെയ്യുന്നതെന്നും മേയര് അറിയിച്ചു.
പശ്ചിമ കൊച്ചിയിലേയ്ക്ക് സര്വീസ് നടത്താനുള്ള പുതിയ ബോട്ടിന്റെ നിര്മ്മാണം പുരോഗമിക്കുകയാണ്. ആറ് മാസത്തിനുള്ളില് തന്നെ ബോട്ട് സര്വീസ് നടത്താനാണ് ലക്ഷ്യമിടുന്നത്. കൂടാതെ പശ്ചിമകൊച്ചിക്ക് പ്രത്യേക പരിഗണന നല്കിയായിരിക്കും വിസകന പദ്ധതികള് ആവിഷ്കരിക്കുന്നത്. തെരുവ് നായ നിര്മാര്ജന പദ്ധതിയുടെ ഭാഗമായുള്ള നഗരസഭയുടെ എബിസി പ്രോഗ്രാം വഴി ആയിരം നായ്ക്കളെ ഇതിനകം വന്ധ്യംകരിച്ചിട്ടുണ്ട്. ആവശ്യമെങ്കില് ഇതിനായി ഒരു യൂനിറ്റുകൂടി സ്ഥാപിക്കും.
മുന് ഭരണ സമിതിയെ പാര്ട്ടിക്കുള്ളിലെ പ്രശ്നങ്ങള് പ്രതിസന്ധിയിലാക്കിയിരുന്നല്ലോയെന്ന ചോദ്യത്തിന് എല്ലാം ശുഭമായിരിക്കുമെന്ന് കരുതുന്നില്ലെന്നും മറ്റുള്ളവരുമായി ചര്ച്ച ചെയ്ത് തീരുമാനമെടുക്കുമെന്നും മേയര് വ്യക്തമാക്കി.
