കൊച്ചി: കൊച്ചി കോര്പ്പറേഷന്റെ 21-ാമത് മേയറായി യുഡിഎഫിലെ സൗമിനി ജയിനും ഡപ്യൂട്ടി മേയറായി ടി.ജെ. വിനോദും തെരഞ്ഞെടുക്കപ്പെട്ടു. ജില്ല കളക്ടര് എം.ജി.രാജമാണിക്യം വരണാധികാരിയായ തെരഞ്ഞെടുപ്പില് മേയര് ജില്ല കളക്ടര്ക്കു മുമ്പിലും ഡപ്യൂട്ടി മേയര് മേയര്ക്കു മുമ്പിലും സത്യപ്രതിജ്ഞ ചെയ്യ്ത് അധികാരമേറ്റു.
മേയര് സ്ഥാനത്തേക്കു നടന്ന തെരഞ്ഞെടുപ്പില് സൗമിനി ജയിന് 41 വോട്ടും എല്ഡിഎഫിലെ പൂര്ണിമയ്ക്കു 30 വോട്ടും ലഭിച്ചു. ബിജെപിയിലെ ശ്യാമള പ്രഭു, സുധ ദിലീപ് കുമാര്, ഇരുമുന്നണിയിലും ഇല്ലാത്ത പ്രീതി എന്നിവര് വോട്ടെടുപ്പില് നിന്നു വിട്ടു നിന്നു. ഇരു മുന്നണികളിലും പെടാത്ത മൂന്നു പേര് സൗമിനിക്കു അനുകൂലമായാണ് വോട്ടു ചെയ്തു. ഡപ്യൂട്ടി മേയര് തെരഞ്ഞെടുപ്പില് ടി.ജെ.വിനോദിന് 40 വോട്ടും എല്ഡിഎഫിലെ കെ.ജെ.ആന്റണിക്കു 31 വോട്ടും ലഭിച്ചു. മൂന്നു പേര് വിട്ടു നിന്നതിനൊപ്പം ഇരു മുന്നണിയിലുമില്ലാത്ത ഒരാള് ആന്റണിക്ക് അനുകൂലമായി വോട്ടു ചെയ്തു. തെരഞ്ഞെടുപ്പ് ഡപ്യൂട്ടി കളക്ടര് എസ്.ഷാനവാസ് നടപടിക്രമങ്ങള് അംഗങ്ങള്ക്ക് വിശദീകരിച്ചു.
പറവൂര്: നഗരസഭ ചെയര്പേഴ്സണായി രമേശ് ഡി. കുറുപ്പും വൈസ് ചെയര്പേഴ്സണായി ജെസി രാജുവും തെരഞ്ഞെടുക്കപ്പെട്ടു.
അങ്കമാലി: അങ്കമാലി നഗരസഭയുടെ പുതിയ അധ്യക്ഷയായി സിപിഎമ്മിലെ എം.എ. ഗ്രേസി തെരഞ്ഞെടുക്കപ്പെട്ടു. വൈസ് ചെയര് പേഴ്സണായി ജനതാദളിന്റെ ബിജു പൗലോസ് തെരഞ്ഞടുക്കപ്പെട്ടു. എം.എ. ഗ്രേസി വരണാധികാരി മുന്പാകെ സത്യപ്രതിജ്ഞ ചെയ്ത് അധികാരമേറ്റു.
ആലുവ: ആലുവ നഗരസഭ ചെയര്പേഴ്സണായി ലിസി എബ്രഹാമും വൈസ് ചെയര്പേഴ്സണായി സി. ഓമനയും സത്യപ്രതിജ്ഞ ചെയ്ത് അധികാരമേറ്റു.
തൃപ്പുണിത്തുറ: തൃപ്പുണിത്തുറ നഗരസഭയുടെ ചെയര്പേഴ്സണായി ചന്ദ്രിക ദേവിയെയും വൈസ് ചെയര്മാനായി ഒ.വി. സലിമിനെയും തെരഞ്ഞെടുത്തു.
കളമശ്ശേരി: ഏലൂര് നഗരസഭ ചെയര്പേഴ്സണ് സ്ഥാനത്തേയ്ക്ക് സിപിഐയിലെ സിജി ബാബു സ്ഥാനമേറ്റു. വൈസ് ചെയര്മാനായി സിപിഎമ്മിലെ എ.ഡി. സുനിലും സ്ഥാനമേറ്റു. ചെയര്പേഴ്സണ് തെരെഞ്ഞെടുപ്പില് സിജി ബാബുവിന് 18 വോട്ടും എതിര് സ്ഥാനാര്ത്ഥി യുഡി എഫിലെ നസീറ റസാക്കിന് 10 വോട്ടും ലഭിച്ചു. കൗണ്സിലിലെ 2 ബിജെപിയംഗങ്ങളും ഒരു സ്വതന്ത്രാംഗവും വിട്ടു നിന്നു.
