കോട്ടയം: ശബരിമല തീര്‍ത്ഥാടനത്തെ അട്ടിമറിക്കാന്‍ ശ്രമിക്കാനുള്ള റെയില്‍വേ അധികൃതരുടെ നീക്കം അപലപനീയമാണെന്ന് ഹിന്ദുഐക്യവേദി സംസ്ഥാന ജനറല്‍ സെക്രട്ടറി ഇ.എസ്. ബിജു പറഞ്ഞു.
റെയില്‍വേ സ്റ്റേഷനില്‍ ബിഎംഎസും ബിജെപിയും മറ്റുഹിന്ദു സംഘടനകളും സംയുക്തമായി ചേര്‍ന്ന് നടത്തിയ ഉപരോധം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ശബരിമല തീര്‍ത്ഥാടനവുമായി ബന്ധപ്പെട്ട് കോടിക്കണക്കിന് രൂപ വരുമാനം ലഭിക്കുന്ന കോട്ടയം റെയില്‍വേ സ്റ്റേഷനില്‍ അയ്യപ്പഭക്തര്‍ക്കായി യാതൊരു അടിസ്ഥാന സൗകര്യങ്ങളും റെയില്‍വേ അധികൃതര്‍ ഒരുക്കിയിട്ടില്ല. അടിസ്ഥാന സൗകര്യങ്ങള്‍ ഒരുക്കും എന്ന് പറയുന്നതല്ലാതെ അതിനായി പ്രവര്‍ത്തിക്കുന്നില്ല. വിവിധ സര്‍ക്കാര്‍ വകുപ്പുകള്‍ ശബരിമല സീസണാകുമ്പോള്‍ കണക്ക് പറഞ്ഞാണ് പണം വാങ്ങുന്നത്.
ശബരിമല തീര്‍ത്ഥാടകരേയും ദേവസ്വം ബോര്‍ഡിനേയും ഇവര്‍ ചൂഷണം ചെയ്യുകയാണ്. കഴിഞ്ഞ വര്‍ഷങ്ങളിലേതുപോലെയാണ് സര്‍ക്കാര്‍ അയ്യുപ്പഭക്തര്‍ക്കു നേരെ പ്രതികരിക്കുന്നതെങ്കില്‍ ശക്തമായ പ്രതിഷേധത്തെ നേരിടേണ്ടി വരുമെന്നും അദ്ദേഹം പറഞ്ഞു.
ശബരിമല തീര്‍ത്ഥാടനവുമായി ബന്ധപ്പെട്ട് റെയില്‍വേ അനുവധിക്കുന്ന ടാക്‌സി പെര്‍മിറ്റ് പകുതിയായി കുറവ് ചെയ്ത റെയില്‍വേ അധികൃതരുടെ നടപടി പ്രതിഷേധാര്‍ഹമാണെന്ന് ബിഎംഎസ് ജില്ലാ സെക്രട്ടറി ടി.എം. നളിനാക്ഷന്‍ അഭിപ്രായപ്പെട്ടു. ഇത് ശബരിമല തീര്‍ത്ഥാടനത്തെ അട്ടിമറിക്കാനും കേന്ദ്രസര്‍ക്കാരിനെ അപകീര്‍ത്തിപ്പെടുത്തുവാനുമുള്ള ഉദ്യോഗസ്ഥരുടെ ഗൂഡാലോചനയുടെ ഭാഗമാണെന്നും അദ്ദേഹം കുറ്റപ്പെടുത്തി. റദ്ദാക്കിയ പെര്‍മിറ്റ് പുനസ്ഥാപിക്കാത്ത പക്ഷം ശക്തമായ പ്രക്ഷോഭ പരിപാടികള്‍ക്ക് രൂപം നല്‍കുമെന്ന് അദ്ദേഹം മുന്നറിയിപ്പ് നല്‍കി.
ബിജെപി നിയോജകമണ്ഡലം പ്രസിഡന്റ് സി.എന്‍. സുഭാഷ് അദ്ധ്യക്ഷത വഹിച്ചു. ബിജെപി ജില്ലാ ജനറല്‍ സെക്രട്ടറി എന്‍. ഹരി, ഉണ്ണികൃഷ്ണന്‍ മൂലയില്‍ എന്നിവര്‍ സംസാരിച്ചു. ബിനു. ആര്‍. വാര്യര്‍, രാധാകൃഷ്ണന്‍ കുടമാളൂര്‍, രാജേഷ് ചെറിയമഠം, അജയന്‍, ജയന്‍ എന്നിവര്‍ ഉപരോധത്തിന് നേതൃത്വം നല്‍കി.
