ചേര്‍ത്തല: വൈകല്യങ്ങളെ മറികടന്ന് ശാസ്ത്രമേളയില്‍ ഭിന്നശേഷിയുള്ള കുട്ടികളുടെ പ്രകടനം. ജില്ലയിലെ പത്ത് സ്‌കൂളുകളിലെ ഭിന്നശേഷിയുള്ള കുട്ടികള്‍ നിര്‍മിച്ച വിവിധതരം ഉല്‍പ്പന്നങ്ങളുടെ പ്രദര്‍ശനമാണ് കാഴ്ചക്കാര്‍ക്ക് കൗതുകമായത്. ആദ്യമായാണ് റവന്യു ജില്ലാ സ്‌കൂള്‍ ശാസ്ത്രമേളയില്‍ ഈ വിഭാഗത്തിലെ കുട്ടികളുടെ കരവിരുതില്‍ നിര്‍മിച്ച ഉല്‍പ്പനങ്ങള്‍ പ്രദര്‍ശിപ്പിച്ചത്. സ്‌കൂളുകളില്‍ ശനിയാഴ്ചകളില്‍ നടത്തുന്ന പ്രവൃത്തിപരിചയ ക്ലാസുകളില്‍ കുട്ടികള്‍ സ്വയം തയാറാക്കിയ വസ്തുക്കളുടെ പ്രദര്‍ശനമാണ് ജില്ലയിലെ റിസോഴ്‌സ് അധ്യാപകരുടെ നേതൃത്വത്തില്‍ ഒരുക്കിയത്.
ഹോളിഫാമിലി സ്‌കൂളില്‍ നടന്ന മേളയില്‍ കുട്ടികള്‍ നിര്‍മിച്ച ഉല്‍പ്പന്നങ്ങള്‍ പ്രദര്‍ശിപ്പിച്ചു. പഴയ പേപ്പറുകള്‍ ഉപയോഗിച്ച് പേപ്പര്‍ ബാഗ്, കപ്പുകള്‍, മുത്തുകള്‍ ഉപയോഗിച്ച് വിവിധതരം മാലകള്‍, മണ്‍പാത്രങ്ങളില്‍ വൈവിധ്യമാര്‍ന്ന നിറം നല്‍കിയവ, കുട്ടികള്‍ വരച്ച ചിത്രങ്ങള്‍, മുത്തുകള്‍ ഉപയോഗിച്ചുള്ള നക്ഷത്രം, തെര്‍മോകോളിലുള്ള വിവിധ രൂപങ്ങള്‍ തുടങ്ങി വൈദ്യുതിയില്‍ പ്രവര്‍ത്തിക്കുന്ന വിളക്കുകള്‍ സ്ഥാപിച്ച വീടുകളും പ്രദര്‍ശനത്തിനുണ്ടായിരുന്നു. ഹോളിഫാമിലി, തുറവൂര്‍ ടി.ഡി, കാവില്‍ സെന്റ് മൈക്കിള്‍സ്, മുഹമ്മ എ.ബി വിലാസം, തിരുനല്ലൂര്‍ ജി.എച്ച്.എസ്.എസ്, പറവൂര്‍ ജി.എച്ച്.എസ്.എസ്, കണ്ടമംഗലം എച്ച്.എസ്.എസ്, കാട്ടൂര്‍ എച്ച്.എഫ്, നടുവട്ടം വി.എച്ച്.എസ്, സെന്റ് മേരീസ് ജി.എച്ച്.എസ്.എസ് എന്നീ സ്‌കൂളുകളിലെ കുട്ടികളാണ് എത്തിയത്.
മല്‍സരത്തിന്റെ ഭാഗമല്ലെങ്കിലും ഇവരുടെ പ്രദര്‍ശനത്തിന് വിദ്യാഭ്യാസ വകുപ്പ് അധികൃതര്‍ പ്രത്യേകമായി അനുവാദം നല്‍കുകയായിരുന്നു.
