തിരുവന്‍വണ്ടൂര്‍: ജനവിശ്വാസം നേടിയ ഭരണത്തിന്റെ നാളുകളിലേക്ക് തിരികെ എത്താന്‍ തിരുവന്‍വണ്ടൂരില്‍ ബിജെപി പ്രചരണം ശക്തം. യുഡിഎഫിന്റെ നേതൃത്വത്തിലുള്ള അഞ്ചുവര്‍ഷത്തെ ഭരണത്തിലെ വീഴ്ചകള്‍ ജനങ്ങളെ ബോധ്യപ്പെടുത്തിയും പഞ്ചായത്തില്‍ നടപ്പാക്കേണ്ട വികസന കാഴ്ചപ്പാടുകള്‍ പങ്കുവച്ചുമാണ് ബിജെപി സ്ഥാനാര്‍ഥികളുടെ പ്രചരണം. വികസനം രാഷ്‌ട്രീയമല്ല അത് ഒരു ഗ്രാമത്തിന്റെ കൂടായ്‌മയുടെ വളര്‍ച്ചയാണെന്ന് പ്രവര്‍ത്തകര്‍ ഓരോ വോട്ടര്‍മാരോടും പങ്കുവയ്‌ക്കുന്നു.
2001 മുതല്‍ 2005 വരെയാണ് ബിജെപി സഖ്യം പഞ്ചായത്ത് ഭരിച്ചത്. മാതൃകാപരമായ ഭരണമായിരുന്നെന്ന് എതിരാളികള്‍ പോലും സമ്മതിച്ചിരുന്നു. എന്നാല്‍ അതിനു ശേഷം പഞ്ചായത്ത് ഭരണം യുഡിഎഫിനായി. അധികാരം പങ്കുവയ്‌ക്കലിനുള്ള തേരോട്ടത്തില്‍ വികസനത്തില്‍ പഞ്ചായത്തിനെ പിന്നോട്ടടിച്ചു. വാഗ്ദാനങ്ങള്‍ മാത്രമാണ് ജനങ്ങള്‍ക്ക് ലഭിച്ചത്.
ജനങ്ങളുടെ ആവശ്യമായ കാര്‍ഷിക മേഖലയിലുള്ള പ്രശ്‌നങ്ങള്‍, റോഡ് വികസനം, സ്‌കൂള്‍ നവീകരണ പ്രവര്‍ത്തനം തുടങ്ങിയവയ്‌ക്ക് പരിഹാരം കാണുമെന്ന് ബിജെപി സഖ്യ സ്ഥാനാര്‍ഥികള്‍ ജനങ്ങള്‍ക്ക് ഉറപ്പു നല്‍കുന്നു.
പഞ്ചായത്ത് തെരഞ്ഞെടുപ്പുമായി ബന്ധപ്പെട്ട് 13 വാര്‍ഡുകളായിട്ട് 48 കുടുംബസംഗമങ്ങള്‍ നടത്തി. ആര്‍എസ്എസ് ജില്ലാ കാര്യവാഹ് ഒ.കെ. അനില്‍ കുമാര്‍, ബാലഗോകുലം ജില്ലാ സംഘടനാ സെക്രട്ടറി കെ.കെ. ജയരാമന്‍, ആര്‍എസ്എസ് താലൂക്ക് വ്യവസ്ഥാപ്രമുഖ് രാജ് കുമാര്‍, ജില്ല കാര്യകാരി സദസ്യന്‍ ആര്‍.അശോക്, ബിജെപി സംസ്ഥാന സമിതിയംഗം ഡി.വിനോദ് കുമാര്‍ എന്നിവര്‍ വിവിധ കുടുംബസംഗമങ്ങളില്‍ പങ്കെടുത്ത് മാര്‍ഗ്ഗ നിര്‍ദ്ദേശങ്ങള്‍ നല്‍കി. ‘അധികാരം അലങ്കാരമല്ല ഉത്തരവാദിത്വമാണ്’ എന്ന സന്ദേശവുമായി ബിജെപി സ്ഥാനാര്‍ഥികള്‍ പഞ്ചായത്തിലെ ഓരോ വീടുകളിലും നാലിലധികം തവണ ഗ്യഹസമ്പര്‍ക്കം നടത്തിക്കഴിഞ്ഞു.
തിരുവന്‍വണ്ടൂര്‍ പഞ്ചായത്തിന്റെ തെരഞ്ഞെടുപ്പ് പ്രചരണവുമായി ബന്ധപ്പെട്ട് ബിജെപി ദേശീയ നിര്‍വ്വാഹക സമിതിയംഗം അല്‍ഫോണ്‍സ് കണ്ണന്താനം കഴിഞ്ഞ ദിവസം നടന്ന പൊതുപരിപാടിയില്‍ പങ്കെടുത്തു.
എല്ലാ ജനവിഭാഗത്തെയും ഉള്‍ക്കൊള്ളുന്ന വികസന കാഴ്‌ച്ചപ്പാടാണ് മോദി നടപ്പാക്കുന്നതെന്ന് അദ്ദേഹം പറഞ്ഞു. 28ന് മുന്‍ ബിജെപി സംസ്ഥാന പ്രസിഡന്റ് പി.കെ. ക്യഷ്ണദാസ് തെരഞ്ഞെടുപ്പുമായി ബന്ധപ്പെട്ട് തിരുവന്‍വണ്ടൂര്‍ പഞ്ചായത്തിലെ വിവിധ പരിപാടിയില്‍ പങ്കെടുക്കും.
പഞ്ചായത്തിലെ ബിജെപി സ്ഥാനാര്‍ത്ഥികള്‍ വാര്‍ഡ് ക്രമത്തില്‍
1. എസ്. രഞ്ജിത്ത് (ബിജെപി), 2. റ്റി.ഗോപി(ബിജെപി), ശ്രീകല സുനില്‍ (എന്‍ഡിഎ സ്വത), 4. സജു ഇടക്കല്ലില്‍ (ബിജെപി), 5. ഉഷാകുമാരി (ബിജെപി), 6. ശാന്തകുമാരി (എന്‍ഡിഎ സ്വത), 7. ജലജ (ബിജെപി), 8. മനോജ്കുമാര്‍ (ബിജെപി), 9. ബി.എന്‍. ആനന്ദ് (ബിജെപി), 10. ഡോ.അനില(ബിജെപി), 11. പ്രീത സന്തോഷ് (സ്വത), 12. രശ്മി സുഭാഷ് (ബിജെപി), 13. മോഹനന്‍ വല്യവീട്ടില്‍(ബിജെപി).
ബ്ലോക്ക് ഡിവിഷന്‍ തിരുവന്‍വണ്ടൂര്‍: ശ്രീകല (കലാരമേശ്), വനവാതുക്കര: പ്രമീള ബൈജു.
