ചേര്ത്തല: ഒരു കാലഘട്ടത്തെ മുഴുവന് തന്റെ തൂലികത്തുമ്പിലൊതുക്കിയ അനശ്വര കവിയുടെ മരിക്കാത്ത ഓര്മ്മകള്ക്ക് ഇന്ന് 40 വയസ്. വിടവാങ്ങി നാല് പതിറ്റാണ്ടുകള് പിന്നിടുമ്പോഴും ഈ മനോഹര തീരത്തു തരുമോ ഇനിയൊരു ജന്മം കൂടി എന്നു പാടിയ കവിയുടെ വയലാര് രാഘവപ്പറമ്പ് കോവിലകത്തെ സ്മാരകത്തിന്റെ പൂര്ത്തീകരണം അനന്തമായി നീളുകയാണ്. സര്ക്കാരിന്റെ അവഗണനയും ട്രസ്റ്റിന്റെ പ്രവര്ത്തനത്തിലെ അപാകതയുമാണ് പ്രിയകവിയുടെ പേരിലുള്ള സ്മാരകത്തിന്റെ പൂര്ത്തീകരണം അനിശ്ചിതത്വത്തിലാകുന്നതിന് കാരണം. നടത്തിപ്പിന്റെ ചുമതല ട്രസ്റ്റിനായതിനാല് മറ്റാര്ക്കും സ്മാരകത്തിന്റെ പ്രവര്ത്തനങ്ങളില് പങ്കാളിയാകുവാന് കഴിയാത്ത സ്ഥിതിയാണ്. ട്രസ്റ്റിന്റെ ഭാരവാഹികളില് ഭൂരിഭാഗവും തലസ്ഥാനജില്ലയുള്പ്പെടെയുള്ള പ്രദേശങ്ങളില് നിന്നുള്ളവരാണെന്നതും പ്രവര്ത്തനങ്ങള്ക്ക് വിലങ്ങുതടിയാകുകയാണ്. 2008ല് അന്നത്തെ സാംസ്ക്കാരിക മന്ത്രി ആയിരുന്ന എം.എ. ബേബി ശിലാസ്ഥാപനം നടത്തിയ ചന്ദ്രകളഭം എന്ന നിത്യസ്മാരകത്തിന്റെ നിര്മ്മാണം 2015 അവസാനിക്കാറായിട്ടും പൂര്ത്തിയാക്കാന് കഴിയാത്തത് വ്യാപക വിമര്ശനത്തിനിടയാക്കിയിട്ടുണ്ട്. ജില്ലാ പഞ്ചായത്ത് വയലാര് രാഘവപ്പറമ്പില് ഒരു ചെറിയ സ്മൃതിമണ്ഡപം സ്ഥാപിച്ചിട്ടുണ്ടെങ്കിലും അതില് പ്രതിമ സ്ഥാപിച്ചിട്ടില്ല. 1975 ഒക്ടോബര് 27 ന് തിരുവനന്തപുരം മെഡിക്കല് കോളേജിലായിരുന്നു വയലാറിന്റെ അന്ത്യം.
അനശ്വര കവിയുടെ മരിക്കാത്ത ഓര്മ്മകള്ക്ക് ഇന്ന് 40 വയസ്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.