പ്രിട്ടോറിയ: കാമുകിയെ വെടിവച്ചു കൊലപ്പെടുത്തിയ കേസിൽ ദക്ഷിണാഫ്രിക്കൻ ബ്ലേഡ് റണ്ണർ ഓസ്ക്കർ പിസ്റ്റോറിയസ് ജയിൽ മോചിതനായി. ജയിൽമോചിതനായെങ്കിലും പിസ്റ്റോറിയസ് വീട്ടുതടങ്കലിൽ കഴിയേണ്ടി വരും. പ്രിട്ടോറിയയിലുള്ള അമ്മാവന്റെ വീട്ടിലായിരിക്കും വീട്ടുതടങ്കൽ. കർശന വ്യവസ്ഥകളോടെയാണ് വീട്ടുതടങ്കൽ.
നവംബർ 3ന് താരത്തിന്റെ അപ്പീൽ സുപ്രീംകോടതി പരിഗണിക്കാനിരിക്കെയാണ്, ദക്ഷിണാഫ്രിക്കൻ പരോൾ റിവ്യൂ ബോർഡ് ഇതുസംബന്ധിച്ച തീരുമാനമെടുത്തത്്. ദക്ഷിണാഫ്രിക്കയിലെ നിയമം അനുസരിച്ച് അഞ്ചോ അതിൽ കുറവോ വർഷത്തെ ശിക്ഷ ലഭിച്ച കുറ്റവാളികൾക്ക് നല്ല നടപ്പായി ഇളവ് അനുവദിക്കാറുണ്ട്. ഇത് പ്രകാരമാണ് പിസ്റ്റോറിയസിന് ഇളവ് നൽകിയത്.
2013 ഫെബ്രുവരി 14 നാണ് കാമുകി റീവ സ്റ്റീൻകാമ്പിനെ പിസ്റ്റോറിയസ് വെടിവെച്ച് കൊലപ്പെടുത്തിയത്. മനപൂർവ്വമല്ലാത്ത നരഹത്യയാണ് താരത്തിനെതിരെ ചുമത്തിയിരുന്നത്. വീട്ടിൽ അതിക്രമിച്ചു കയറിയ വ്യക്തിയെ ആളറിയാതെ വെടിയുതിർക്കുകയായിരുന്നുവെന്നാണ് പിസ്റ്റോറിയസിന്റെ വാദം.
തടവ് ശിക്ഷയ്ക്ക് വിധേയനാക്കിയ പിസ്റ്റോറിയസിനെ പിന്നീട് ജയിൽ മോചിതനാക്കാൻ തീരുമാനിച്ചെങ്കിലും ദക്ഷിണാഫ്രിക്കൻ നിയമമന്ത്രി ഇടപെട്ട് നടപടി റദ്ദാക്കുകയായിരുന്നു.
