പാലാ: കെഎസ്ആര്ടിസി സ്റ്റാന്ഡിലെ സ്ത്രീകളുടെ വിശ്രമസങ്കേതത്തില് ജീവനക്കാര്ക്കായും പൊതുജനങ്ങള്ക്കായും പൊതുകക്കൂസ് തുറന്നുകൊടുത്തത് പ്രതിഷേധത്തിനിടയാക്കുന്നു. കെഎസ്ആര്ടിസി പുതുതായി പണികഴിപ്പിക്കുന്ന സ്റ്റാന്റ് കം ഷോപ്പിംഗ് കോപ്ലക്സിന്റെ നിര്മ്മാണവുമായി ബന്ധപ്പെട്ട് ഇവിടെയുണ്ടായിരുന്ന പൊതുകക്കൂസ് പൊളിച്ചുനീക്കിയിരുന്നു. ഇതോടെയാണ് സ്ത്രീകളുടെ വിശ്രമമുറിക്ക് അകത്തുണ്ടായിരുന്ന കക്കൂസ് പൊതുകക്കൂസായി മാറ്റിയത്.
പൊതുജനങ്ങള്ക്കായി കക്കൂസ് തുറന്നുകൊടുത്തതോടെ സ്ത്രീ യാത്രക്കാര് ഏറെ ബുദ്ധിമുട്ടുകയാണ്. സ്ത്രീകള്ക്കിടയിലൂടെയാണ് ജീവനക്കാരും യാത്രക്കാരും ഇപ്പോള് പ്രാഥമിക ആവശ്യങ്ങള് നിറവേറ്റാന് പോകുന്നത്. ജീവനക്കാര്ക്ക് ഉപയോഗിക്കുന്നതിനായി എന്ക്വയറി റൂമിന് സമീപത്തായി രണ്ട് കക്കൂസുകളും മൂത്രപ്പുരയും ഉള്പ്പെടുന്ന ശൗചാലയമാണ് സ്ത്രീകളുടെ വിശ്രമമുറിക്കകത്ത് നിന്നും വാതില് നിര്മ്മിച്ച് തുറന്നു കൊടുത്തിരിക്കുന്നത്. 350 ജീവനക്കാര് ക്കും യാത്രക്കാര്ക്കുമായി ആകെ രണ്ട് കക്കൂസുകളും രണ്ട് മൂത്രപ്പുരയും മാത്രമാണ് നിലവിലുള്ളത്.
പുറത്തെ മൂത്രപ്പുര പൊളിച്ചുമാറ്റുന്നതോടൊപ്പം സൗകര്യപ്രദമായ സ്ഥലത്ത് മാറ്റി നിര്മ്മിക്കാന് ഉദ്ദേശിച്ചിരുന്നെങ്കിലും എടിഒയുടെ പിടിവാശിയാണ് ഇത് നടക്കാതിരിക്കാന് കാരണമെന്ന് ആക്ഷേപമുണ്ട്. ബദല് സൗകര്യം ഏര്പ്പെടുത്താതെ സ്ത്രീകളുടെ വിശ്രമ സങ്കേതത്തിലൂടെ പ്രവേ ശിക്കുന്ന തരത്തില് ജീവനക്കാരുടെ കക്കൂസ് തുറന്നുകൊടുത്തതും ഇദേഹത്തിന്റെ നിര്ദ്ദേശപ്രകാരമാണെന്ന് പറയുന്നു. സ്ത്രീകളുടെ മുറിക്കുള്ളിലും പരിസരപ്രദേശത്തും അസഹനീയമായ ദുര്ഗന്ധമാണ് പരക്കുന്നത്. സ്ത്രീകളുടെ മൂത്രപ്പുരയും ഇതിനു സമീപമാണ്.
