കൊല്ലം: ബിജെപി ദേശീയ അദ്ധ്യക്ഷന് അമിത്ഷാ 27ന് കൊല്ലത്ത്. ബിജെപി ജില്ലാസമിതി സംഘടിപ്പിക്കുന്ന നവോത്ഥാനസംഗമത്തില് പങ്കെടുക്കാനാണ് അദ്ദേഹം എത്തുന്നത്. കന്റോണ്മെന്റ് മൈതാനിയില് ഉച്ചക്ക് രണ്ടിനാണ് പരിപാടി. പരിപാടിയുടെ ഒരുക്കങ്ങള് അവസാനഘട്ടത്തിലാണെന്ന് ജില്ലാ പ്രസിഡന്റ് എം.സുനില് വാര്ത്താസമ്മേളനത്തില് പറഞ്ഞു.
നവോത്ഥാനപ്രസ്ഥാനങ്ങളെയും നവോത്ഥാനനായകരെയും വെല്ലുവിളിക്കുന്ന വര്ത്തമാനകാല രാഷ്ട്രീയാന്തരീക്ഷത്തില് നവോത്ഥാനസംഗമത്തിന്റെ പ്രസക്തി ഏറെയാണെന്ന് അദ്ദേഹം പറഞ്ഞു. കൊല്ലത്തിന്റെ നവോത്ഥാന പാരമ്പര്യം വിവരണാതീതമാണ്. കമ്യൂണിസ്റ്റുകാര് ഊറ്റംകൊള്ളുന്ന റഷ്യന് വിപ്ലവം നടക്കുന്നതിനും വര്ഷങ്ങള്ക്ക് മുമ്പ് അടിച്ചമര്ത്തലിനും അസമത്വത്തിനുമെതിരെ ജനകീയപോരാട്ടം നടന്നത് കൊല്ലത്തിന്റെ മണ്ണിലാണ്. പെരിനാട് വിപ്ലവം എന്ന പേരില് ചരിത്രം ഇതിനെ രേഖപ്പെടുത്തിയിട്ടുണ്ട്. ചട്ടമ്പിസ്വാമിക്കും ശ്രീനാരായണഗുരുവിനും അയ്യങ്കാളിക്കും നിര്ണായക സ്വാധീനമാണ് കൊല്ലത്തെ നവോത്ഥാനത്തിലുള്ളത്. നവോത്ഥാന സംഗമത്തില് അരലക്ഷം പ്രവര്ത്തകര് ജില്ലയില് നിന്നും പങ്കെടുക്കും. ദേശീയ സെക്രട്ടറിയായ എച്ച്.രാജ, സംസ്ഥാന അധ്യക്ഷന് വി.മുരളീധരന് എന്നിവര് സംബന്ധിക്കും. തയ്യാറെടുപ്പിന്റെ ഭാഗമായുള്ള പ്രവര്ത്തനങ്ങള് ബൂത്ത്തലങ്ങളില് വരെ പൂര്ത്തിയായിട്ടുണ്ട്. പഞ്ചായത്ത് തലത്തില് പ്രവര്ത്തകയോഗങ്ങളും മഹിളാകൂട്ടായ്മകളും ബൈക്ക് റാലികളും ഇതിനോടകം സംഘടിപ്പിച്ചു.
പരിപാടിയുടെ മുന്നോടിയായി ഇന്ന് വൈകിട്ട് നാലിന് ആനന്ദവല്ലീശ്വരം ക്ഷേത്രമൈതാനായില് നിന്നും വിളംബരജാഥ നടക്കും. ജാഥ നഗരം ചുറ്റി കന്റോണ്മെന്റ് മൈതാനത്ത് സമാപിക്കും. ഇന്നലെ കന്റോണ്മെന്റ് മൈതാനത്ത് പന്തല് കാല്നാട്ടുകര്മ്മം ബിജെപി ജില്ലാ വൈസ് പ്രസിഡന്റ് എസ്.ദിനേശ്കുമാര് നിര്വഹിച്ചു. കേരളത്തില് ദേശീയപ്രസ്ഥാനത്തിന്റെ വളര്ച്ചയുടെ വ്യാപ്തി വരാന്പോകുന്ന തെരഞ്ഞെടുപ്പുകളില് പ്രതിഫലിക്കുമെന്ന് എം.സുനില് പറഞ്ഞു.
ജില്ലാ വൈസ് പ്രസിഡന്റുമാരായ എസ്.ദിനേശ്കുമാര്, മാമ്പുഴ ശ്രീകുമാര്, ജനറല് സെക്രട്ടരി വെള്ളിമണ് ദിലീപ്, അഡ്വ.വിനോദ് എന്നിവരും പത്രസമ്മേളനത്തില് പങ്കെടുത്തു.
