കോഴിക്കോട്: കുതിരവട്ടം മാനസികാരോഗ്യകേന്ദ്രത്തില് നിന്നു തടവുചാടിയ യുവതി പിടിയില്. പരപ്പനങ്ങാടി തെക്കേലത്ത് നസീമയാണ് (28) കൊച്ചിയിലെ ഫഌറ്റില് നിന്ന് പിടിയിലായത്. മെഡിക്കല് കോളജ് എസ്ഐ പി. അശോകന്റെ നേതൃത്വത്തിലുള്ള അഞ്ചംഗസംഘമാണ് പ്രതിയെ കസ്റ്റഡിയിലെടുത്തത്.
ആഗസ്റ്റ് 15 ന് പുലര്ച്ചെ നാലരയോടെയാണു നസീമ മഴു ഉപയോഗിച്ചു വനിതാ സെല്ലിന്റെ ചുമരു തുരന്നു രക്ഷപ്പെട്ടത്. ഭിത്തി തുരക്കാനുപയോഗിച്ച മഴു ആശുപത്രിവളപ്പില് നിന്നും പോലീസ് കണ്ടെടുത്തിരുന്നു. വേങ്ങര സ്വദേശിയെ വിവാഹം കഴിച്ചശേഷം മുങ്ങിയ കേസിലായിരുന്നു ഇവര് വേങ്ങര പോലീസിന്റെ പിടിയിലായത്. നസീമക്കു മാനസികാസ്വാസ്ഥ്യമുള്ളതിനെത്തുടര്ന്നാണു മലപ്പുറം സി.ജെ.എം. കോടതി കുതിരവട്ടം ആശുപത്രിയിലേക്കു മാറ്റിയത്. ജൂണ് 16നായിരുന്നു കുതിരവട്ടം ആശുപത്രിയില് പ്രവേശിച്ചത്. നസീമയെ സെല്ലില് തനിച്ചാണ് താമസിപ്പിച്ചിരുന്നത്. ഭിത്തിയില് ദ്വാരമുണ്ടാക്കി പുറത്തുകടന്നു സെല്ലിനു പുറകിലെ കാടുപിടിച്ച സ്ഥലത്തുകൂടി ചുറ്റുമതിലിലെ കമ്പിവേലി ചാടി പുറത്തുകടക്കുകയായിരുന്നുവെന്നാണു അന്വേഷണത്തില് കണ്ടെത്തിയത്.
തൃപ്പുണിത്തുറ ശാസ്ത്രിനഗര് റസിഡന്റ് കോളനിയിലെ ഫഌറ്റിലായിരുന്നു താമസം. ഇതിനിടെ, നസീമ കൊച്ചിയിലുണ്ടെന്ന് മെഡിക്കല് കോളജ് സിഐക്കു രഹസ്യസന്ദേശം ലഭിച്ചു.
കഴിഞ്ഞ ഒരാഴ്ചയായി നസീമയെ തിരഞ്ഞ് മൂന്നു പോലീസുകാര് കൊച്ചിയില് അന്വേഷണം നടത്തുന്നുണ്ടായിരുന്നു. നസീമയുടെ പുതിയ മൊബൈല് ഫോണ് നമ്പര് കേന്ദ്രീകരിച്ച് അന്വേഷണം നടത്തുന്നതിനിടെ കഴിഞ്ഞ വെള്ളിയാഴ്ച യുവതി ഫഌറ്റ് ഒഴിഞ്ഞു. പോലീസ് പിന്തുടരുന്നുണ്ടെന്ന സംശയത്തെ തുടര്ന്നായിരുന്നു ഇത്. ഇന്നലെ പുലര്ച്ചെ ലോഡ്ജില്നിന്നാണ് നസീമയെ പിടികൂടുന്നത്. വിവിധ ജില്ലകളിലായി 15 മോഷണ കേസുകളില് പ്രതിയാണ് നസീമ.
