ന്യൂദല്‍ഹി: പാക് ഭീകര സംഘടനയായ ജെയ്ഷ് ഇ മുഹമ്മദ് പുനരുജ്ജീവിപ്പിക്കാന്‍ പാക്കിസ്ഥാന്റെ ശ്രമം. അല്പകാലം മുന്‍പ് പ്രവര്‍ത്തനം നിലച്ച ഈ ഭീകരസംഘടനയെ സജീവമാക്കി ഭാരതത്തിന് എതിരെ ഭീകരാക്രമണങ്ങള്‍ അഴിച്ചുവിടാനാണ് പാക് ചാരസംഘടനയായ ഐഎസ്‌ഐയുടെ നീക്കം.
2001ലെ പാര്‍ലമെന്റാക്രമണം അടക്കം ഭാരതത്തിലെ നിരവധി ഭീകരാക്രമണങ്ങള്‍ ആസൂത്രണം ചെയ്ത് നടപ്പാക്കിയത് ജെയ്ഷ് ഇ മൊഹമ്മദാണ്. ഭാരതത്തിന്റെറോയാണ് പാക് നീക്കം കണ്ടെത്തി റിപ്പോര്‍ട്ട് ചെയ്തിരിക്കുന്നത്. ജമ്മുകശ്മീരിലും ഭാരതത്തിലെ മറ്റു സ്ഥലങ്ങളിലും ആക്രമണങ്ങള്‍ അഴിച്ചുവിടാനാണ് പാക് പദ്ധതി.
പാക്കിസ്ഥാനിലെ ചില ഭീകരാക്രമണങ്ങളില്‍ ജെയ്ഷ് ഇ മൊഹമ്മദിന് പങ്കുണ്ടെന്ന് കണ്ടെത്തിയതോടെയാണ് പാക്കിസ്ഥാന്‍ ഇതിന്റെ പ്രവര്‍ത്തനം നിര്‍ത്തിവച്ചിരുന്നത്. ലഷ്‌ക്കര്‍ ഇ തൊയ്ബ, ഇന്ത്യന്‍ മുജാഹിദ്ദീന്‍ എന്നിവയടക്കം നിരവധി ഭീകര സംഘടനകള്‍ ഇപ്പോള്‍ത്തന്നെ പാക്കിസ്ഥാന്‍ കേന്ദ്രമാക്കി ഭാരതത്തിന് എതിരെ നിഴല്‍യുദ്ധം നടത്തിവരികയാണ്.
താലിബാന്‍, ഐഎസ് തുടങ്ങിയ അന്താരാഷ്‌ട്ര ഭീകരസംഘടനകളും ഭാരതത്തിന് എതിരെ ഭീഷണി മുഴക്കിയിട്ടുണ്ട്. അവയ്‌ക്കു പിന്നാലെയാണ് ജെയ്ഷ് ഇ മൊഹമ്മദ് പുനരുജ്ജീവിപ്പിക്കാനുള്ള പാക് നീക്കം. കൊടും ഭീകരന്‍ മൗലാനാ മസൂദ് അസറാണ് മുന്‍പ് ജെയ്ഷ് ഇ മൊഹമ്മദ് സ്ഥാപിച്ചത്. ഇയാള്‍ ഇപ്പോള്‍ പാക്കിസ്ഥാനില്‍ സുഖജീവിതം നയിച്ച് ഭാരതത്തിന് എതിരെ ജിഹാദിന് ആളെ സംഘടിപ്പിച്ചുവരികയാണ്. മുഹമ്മദിന്റെ സൈന്യം എന്നതാണ് ജെയ്ഷ് ഇ മൊഹമ്മദ് എന്നതിന്റെ അര്‍ഥം.
ഭാരതത്തിനു പുറമേ അമേരിക്ക, ബ്രിട്ടന്‍, ആസ്‌ട്രേലിയ, കാനഡ, യുഎഇ, ഐക്യരാഷ്‌ട്ര സഭ എന്നിവ നിരോധിച്ചിട്ടുള്ള ഭീകര സംഘടനയാണ് ജയ്ഷ് ഇ മൊഹമ്മദ്. ഹര്‍ക്കത്തുള്‍ മുജാഹിദ്ദീനില്‍ പ്രവര്‍ത്തിച്ചിരുന്ന മസൂദ് അസര്‍ അതില്‍ നിന്ന് മാറിയാണ് ജെയ്ഷ് ഇ മൊഹമ്മദ് രൂപീകരിച്ചത്. പാര്‍ലമെന്റ് ആക്രമണക്കേസില്‍ തൂക്കിലേറ്റപ്പെട്ട അഫ്‌സല്‍ ഗുരു ജെയ്ഷ് ഇ മൊഹമ്മദ് ഭീകരനായിരുന്നു. 2002ല്‍ പാക്കിസ്ഥാനില്‍ വിലക്കിയതോടെ ഖദം ഉള്‍ ഇസ്ലാം എന്ന് പേരുമാറ്റി പ്രവര്‍ത്തനമാരംഭിച്ചു.
