കാന്‍ബറ: ആസ്‌ട്രേലിയയുടെ പുതിയ പ്രധാനമന്ത്രിയായി മാല്‍കം ടേണ്‍ബുള്‍ സത്യപ്രതിജ്ഞ ചെയ്ത് ചുമതലയേറ്റു. ലിബറല്‍ പാര്‍ട്ടി തെരഞ്ഞെടുപ്പില്‍ പരാജയപ്പെട്ടതോടെ നിലവിലെ പ്രധാനമന്ത്രിയായിരുന്ന ടോണി അബട്ടിന് സ്ഥാനം നഷ്ടമാവുകയായിരുന്നു. സര്‍ക്കാര്‍ പ്രതീക്ഷക്കൊത്തുയര്‍ന്നില്ലെന്ന വിമര്‍ശമാണ് അബട്ടിന് വിനയായത്. സത്യപ്രതിജ്ഞക്ക് ശേഷം മാല്‍കം ടേണ്‍ബുള്‍ പ്രധാനമന്ത്രിയെന്ന നിലയില്‍ പാര്‍ലമെന്റിനെ അഭിസംബോധന ചെയ്തു.
മുന്‍ ഇന്‍വെസ്റ്റ്‌മെന്റ ബാങ്കറും പ്രമുഖ അഭിഭാഷകനും അബട്ട് മന്ത്രിസഭയിലെ വാര്‍ത്താവിതരണമന്ത്രിയുമായിരുന്ന മാല്‍കം ടേണ്‍ബുളിനെ ലിബറല്‍ പാര്‍ട്ടി നേതാവായി ഭൂരിപക്ഷം എംപിമാരും തെരഞ്ഞെടുക്കുകയായിരുന്നു.
പ്രധാനമന്ത്രിയായ ടോണി അബട്ടിനെതിരെയുള്ള മത്സരത്തില്‍ 44നെതിരെ 54 വോട്ടുകള്‍ക്കാണ് ആസ്‌ട്രേലിയയുടെ 29-ാമത് പ്രധാനമന്ത്രിയായി ടേണ്‍ബുള്ളിനെ തെരഞ്ഞെടുത്തത്. ഗവര്‍ണര്‍ ജനറലിന് അബട്ട് രാജിക്കത്ത് നല്‍കുന്നതിന് തൊട്ടുപിന്നാലെയായി ടേണ്‍ബുള്‍ സത്യപ്രതിജ്ഞ ചെയ്തത്. 2009 ല്‍ ലിബറല്‍ പാര്‍ട്ടി നേതൃമാറ്റ തെരഞ്ഞെടുപ്പില്‍ ടേണ്‍ബുള്ളിനെ പിന്തള്ളിയാണ് അബട്ട് പ്രധാനമന്ത്രിയായത്. രാജ്യത്തിന് ആവശ്യമായ സാമ്പത്തികനേതൃത്വവും ആത്മവിശ്വാസവും നല്‍കാന്‍ അബട്ടിന് സാധിച്ചില്ലെന്ന് വോട്ടെടുപ്പിന് തൊട്ടുമുന്‍പായി നടത്തിയ പത്രസമ്മേളനത്തില്‍ ടേണ്‍ബുള്‍ പറഞ്ഞു.
30നെതിരെ 70 വോട്ട് നേടി ജൂലി ബിഷപ്പ് ഉപനേതാവായി വീണ്ടും തെരഞ്ഞെടുക്കപ്പെട്ടു. ലിബറല്‍ ഉപനേതാവ് ജൂലി ബിഷപ്പ് നേരത്തെ തന്നെ ടേണ്‍ബുളിന് പിന്തുണ പ്രഖ്യാപിച്ചിരുന്നു. എന്നാല്‍ പാര്‍ട്ടിയിലെ പ്രമുഖനും സാമൂഹിക സേവന മന്ത്രിയുമായ സ്‌കോട് മോറിസണ്‍ ഉള്‍പ്പെടെയുള്ളവരുടെ പിന്തുണ അബട്ടിനായിരുന്നു.
ബജറ്റിലെ കടുത്ത നടപടികളുടെ പേരില്‍ അബട്ടിനു മേല്‍ മാസങ്ങളായി സമ്മര്‍ദം ശക്തമാണ്. അടുത്തിടെ നടന്ന അഭിപ്രായ സര്‍വേകളില്‍ പ്രധാനമന്ത്രിയെ അനുകൂലിക്കുന്നവരുടെ എണ്ണം ഗണ്യമായി കുറഞ്ഞിരുന്നു. കഴിഞ്ഞ ഫെബ്രുവരിയിലും ലിബറല്‍ പാര്‍ട്ടിയിലെ നേതൃമാറ്റത്തിനായി ശ്രമം നടന്നെങ്കിലും പാര്‍ലമെന്റ് അംഗങ്ങള്‍ വോട്ടെടുപ്പിന് അനുമതി നല്‍കിയിരുന്നില്ല.
ആസ്‌ട്രേലിയ ഭാരതത്തിന് യൂറേനിയം വില്‍ക്കുന്നതിനെ അബട്ട് ശക്തമായി പിന്‍തുണച്ചിരുന്നു. 2014 സപ്തംബറില്‍ ന്യൂദേല്‍ഹിയില്‍ യുറേനിയം വില്പന സംബന്ധിച്ച് പ്രധാനമന്ത്രി നരേന്ദ്ര മോദിയുമായി കരാറില്‍ ഒപ്പ് വച്ചിരുന്നു.
