സിഡ്നി: ഓസ്ട്രേലിയന് ടെസ്റ്റ് ക്രിക്കറ്റ് ചരിത്രത്തിലെ മികച്ച ഓപ്പണിങ് ബാറ്റ്സ്മാന്മാരിലൊരാളായ ആര്തര് മോറിസ് (93) അന്തരിച്ചു. 1948ല് ഇതിഹാസം താരം ഡോണ് ബ്രാഡ്മാന് നയിച്ച ആഷസ് ടീമില് ഓപ്പണറായിരുന്ന മോറിസ്, പരമ്പരയില് ടോപ് സ്കോററായതോടെയാണ് ശ്രദ്ധേയനായത്. 46 ടെസ്റ്റില്നിന്ന് 46.48 ശരാശരിയില് 3,533 റണ്സ് നേടിയിട്ടുണ്ട് ഈ ഇടംകൈയന് ബാറ്റ്സ്മാന്. രണ്ട് വട്ടം ടീമിനെ നയിച്ചിട്ടുള്ള മോറിസ്, ചൈനാമന് സ്പിന്നറുമായിരുന്നു.
അരങ്ങേറ്റ പരമ്പരയില് തുടരെ മൂന്ന് ഇന്നിങ്സുകളില് സെഞ്ചുറി നേടിയിട്ടുണ്ട് മോറിസ്. 1946-47 സീസണില് ഇംഗ്ലണ്ടിനെതിരേ അരങ്ങേറ്റം. 12 സെഞ്ചുറിയും അത്രയും അര്ധശതകവും ഇദ്ദേഹത്തിന്റെ ക്രെഡിറ്റില്. ഇംഗ്ലണ്ടിനെതിരേ അഡ്ലെയ്ഡ് ഓവലില് നേടിയ 206 ഉയര്ന്ന സ്കോര്. ടെസ്റ്റില് രണ്ടു വിക്കറ്റും ഇദ്ദേഹത്തിന്റെ സമ്പാദ്യത്തില്. ഫസ്റ്റ് ക്ലാസ് ക്രിക്കറ്റില് 46 സെഞ്ചുറിയടക്കം 12,000ത്തിലേറെ റണ് നേടിയിട്ടുണ്ട്.
ഓസ്ട്രേലിയയുടെ കഴിഞ്ഞ നൂറ്റാണ്ടിലെ ടെസ്റ്റ് ടീമിലും ഇദ്ദേഹം ഇടംപിടിച്ചു. ടെസ്റ്റിലെ നാലാമിന്നിങ്സില് നാനൂറിലപ്പുറം റണ് മറികടക്കുന്നത് അപ്രാപ്യമെന്നു കരുതിയ കാലത്ത് ഓസീസിനെ ആ സമ്മോഹന നേട്ടത്തിലേക്ക് നയിച്ചയാളാണ് മോറിസ്. ബ്രാഡ്മാനെ പോലൊരു ഇതിഹാസം ടീമിലുണ്ടായിട്ടും 1948ലെ ആഷസില് ഇംഗ്ലണ്ട് ഉയര്ത്തിയ 404 റണ്സ് മോറിസിന്റെ 182 റണ്സ് ബലത്തില് മൂന്നു വിക്കറ്റ് മാത്രം നഷ്ടപ്പെടുത്തി മറികടന്നു ഓസ്ട്രേലിയ. ഒരുപക്ഷേ, ബ്രാഡ്മാന്റെ കാലഘട്ടത്തിലായിരുന്നില്ല ഇദ്ദേഹമെങ്കില് ക്രിക്കറ്റ് ചരിത്രത്തിലെ തന്നെ ഇതിഹാസങ്ങളിലൊന്നായി മാറിയേനെ മോറിസ്.
മാറിസിന്റെ മരണത്തോടെ ഓസ്ട്രേലിയയിലെ ഏറ്റവും പ്രായം ചെന്ന ടെസ്റ്റ് ക്രിക്കറ്ററാണ് വിടവാങ്ങിയത്. വിക്കറ്റ് കീപ്പര് ലെന് മഡ്ഡോക്സ് ഇനി ഓസീസ് ക്രിക്കറ്റിലെ കാരണവര്. 89 വയസുണ്ട് ഇദ്ദേഹത്തിന്.
