ബാഗ്ദാദ്: തങ്ങള് പിടികൂടി ലൈംഗിക അടിമകളാക്കുന്ന കുട്ടികള്ക്ക് ഐഎസ് എന്ന അന്താരാഷ്ട്ര ഭീകരസംഘടന വിലയിട്ടതായി ഐക്യരാഷ്ട്ര സഭ സ്ഥിരീകരിച്ചു. ഐഎസ് നേതൃത്വം അംഗീകരിച്ച കുട്ടികളുടെ വിലവിവരപ്പട്ടിക സിറിയയിലും ഇറാഖിലുമുള്ള ഐഎസ് നേതാക്കള്ക്ക് വിതരണം ചെയ്തിട്ടുള്ളതായും യുഎന് ഉദ്യോഗസ്ഥ സൈനബാ ബംഗൂറ പറഞ്ഞു.
താന് ഇത്തരമൊരു വിലവിവരപ്പട്ടിക കാണുകയും ചെയ്തു. ഏപ്രിലില് താന് ഇറാഖിലെത്തിയ സമയത്താണ് പട്ടിക ലഭിച്ചത്. ലൈംഗിക അടിമകളാക്കുന്ന കുട്ടികള്ക്കുള്ള വിലയാണ് പട്ടികയില് ചേര്ത്തിരിക്കുന്നത്. പെട്രോള് വീപ്പ കൊണ്ടുപോകുന്നതുപോലെയാണ് പെണ്കുട്ടികളെ അവര് കടത്തുന്നത്. ഇവരെ വില്ക്കും. ചിലര് ഇവരെ വാങ്ങി കൂടിയ വിലയ്ക്ക് ഇവരുടെ കുടുംബത്തിന് മടക്കി നല്കും. ആയിരക്കണക്കിന് ഡോളറാണ് ഇങ്ങനെ ഇവര് വാങ്ങിയെടുക്കുന്നത്.
ഒന്നു മുതല് ഒന്പതു വയസുവരെയുള്ള കുട്ടികള്ക്ക് 165 ഡോളറാണ് ഏകദേശ വില. പ്രായം കൂടും തോറും വിലയും കുറയും. യസീദി ക്കുട്ടികളാണ് ഇവര് അടിമകളാക്കുന്നവരില് കൂടുതലും. പിടിയിലാകുന്ന യസീദി പെണ്കുട്ടികളെ ആദ്യം നേതാക്കള്ക്ക് കാഴ്ച വയ്ക്കും. പിന്നെ വിദേശികള്ക്ക് വില്ക്കാന് വയ്ക്കും. മധ്യേഷ്യയിലെ സമ്പന്നന്മാരാണത്രെ ഇവരെ ആയിരക്കണക്കിന് ഡോളറിന് വാങ്ങുക. തുടര്ന്ന് ഇവരെ ജിഹാദിന് ഇറങ്ങിത്തിരിച്ച ഭീകരര്ക്ക് തുച്ഛമായ വിലയ്ക്ക് കൈമാറും.
ചന്തയിലെന്ന പോലെ സ്ത്രീകളെ ലേലത്തിനു വച്ചിരിക്കുന്നതും ഭീകരര് വന്ന് വിലപേശുന്നതുമായ ദൃശ്യങ്ങള് കഴിഞ്ഞ ദിവസം പുറത്തുവന്നിരുന്നു.
