ന്യൂദല്ഹി: ജമ്മുകശ്മീരിലെ ഉധംപൂരില് ബുധനാഴ്ച നടന്ന ഭീകരാക്രമണത്തില് നിരവധി പേര് കൊല്ലപ്പെടുമായിരുന്നു. എന്നാല് ബിഎസ്എഫ് സൈനികരുടെ സമയോചിതമായ തിരിച്ചടിയാണ് ഭീകരരുടെ പദ്ധതി പൊളിച്ചതും ഒരാളെ കൊന്നതും ഒരാളെ പിടികൂടാന് സഹായിച്ചതും. കൂട്ടക്കൊല തടയാനുള്ള തീവ്രശ്രമത്തിനിടെ ധീര സൈനികരായ റോക്കി, സുബേന്ദു റായി എന്നിവര്ക്ക് ജീവന് വെടിയേണ്ടിവന്നു.
ഭീകരാക്രണം ഉണ്ടായ സമയത്ത് ആയുധമേന്തിയ ഒരാള് മാത്രമേ ബസിലുണ്ടായിരുന്നുള്ളൂ, റോക്കി. ബസിനു നേരെ വെടിവയ്പ്പ് ഉണ്ടായതോടെ ജീവന് ബലികഴിച്ചും റോക്കി അവരെ നേരിട്ടു. ബിഎസ്എഫ് ഡയറക്ടര് ജനറല് ഡികെ പഥക് പറഞ്ഞു.
റോഡിനു നടുക്ക് നിന്ന് ആരോ ബസിനു നേരെ വെടിയുതിര്ക്കുന്നതാണ് ആദ്യം റോക്കി കണ്ടത്. ബസ് ഡ്രൈവര് സുബേന്ദു റായിക്ക് വെടിയേറ്റതായും റോക്കിക്ക് മനസിലായി.തനിക്ക് വെടിയേറ്റിട്ടും ഭീകരര് ബസില് കയറുന്നത് തടയാന് റായിക്കും കഴിഞ്ഞു. ഈ സമയമാണ് രണ്ടു ഭീകരര് ബസിന്റെ വാതില് തുറന്ന് അകത്തു കടക്കാന് ശ്രമിക്കുന്നത് റോക്കി കണ്ടത്. അല്പ്പ സമയം പോലും കളയാതെ റോക്കി തോക്ക് അവിടേക്ക് തിരിച്ച് വെടിവയ്പ്പ് ആരംഭിച്ചു.
റോക്കിയുടെ എകെ 47 തോക്കില് നിന്നുള്ള വെടിയേറ്റ് ഒരു ഭീകരര് മരിച്ചു വീണിരുന്നു. ഭീകരരെ സധൈര്യം വെടിവെച്ചു വീഴ്ത്തിയ റോക്കിയുടെ തോക്കില് ഒരു വെടിയുണ്ട പോലും ബാക്കിയുണ്ടായിരുന്നില്ല. ബിഎസ്എഫ് മേധാവി പറഞ്ഞു.
റോക്കിയുടെ അതിശക്തമായ തിരിച്ചടിയെത്തുടര്ന്ന് ഒരു ഭീകരന് ഓടിരക്ഷപ്പെടുകയായിരുന്നു. റോക്കി തിരിച്ചടിച്ചില്ലായിരുന്നെങ്കില് മരണം കൂടുമായിരുന്നു. വെടിയേറ്റിട്ടും റോക്കി പിന്മാറിയില്ല. ഒടുവില് ഭീകരരെ നേരിട്ട് റോക്കി മരണം വരിക്കുകയായിരുന്നു.
പന്ത്രണ്ടു ദിവസം മുന്പ് എത്തി
പന്ത്രണ്ടു ദിവസം മുന്പാണ് താന് ഭാരതത്തിലേക്ക് തിരിച്ചതെന്നും രണ്ടു ദിവസം മുന്പാണ് ഭാരതത്തില് എത്തിയതെന്നുമാണ് നാവേദ് ഖാന് പറയുന്നത്. എന്നാല് ഇത് ശരിയല്ലെന്നാണ് സുരക്ഷാ ഏജന്സികള് പറയുന്നത്. ഇയാള് ഒരു മാസം മുന്പ് ഭാരതത്തില് എത്തിയിരുന്നുവെന്നാണ് സംശയം.
ചോദ്യങ്ങളോട് ഒരു ചാഞ്ചല്യവും ഇല്ലാതെയാണ് ഇയാള് പ്രതികരിക്കുന്നതെന്ന് അവര് ചൂണ്ടിക്കാട്ടുന്നു. തങ്ങള് കൊണ്ടുവന്ന ഭക്ഷണം മൂന്നു ദിവസം കൊണ്ട് തീര്ന്നു. പിന്നെ തങ്ങള് ഒരു വീട് കുത്തിക്കവര്ന്ന് ഭക്ഷണമെടുത്തു. ഇയാള് പറഞ്ഞു. പാക്കിസ്ഥാനിലെ ഫൈസലാബാദിലെ ഗുലാം മുഹമ്മദാബാദ് സ്വദേശിയാണ് താനെന്ന് ഇയാള് വെളിപ്പെടുത്തുന്നു. ലഷ്ക്കര് പ്രവര്ത്തകനാണ് താനെന്നും ഇയാള് സമ്മതിച്ചു.
ഉസ്മാന് ഖാന് പാക്കിസ്ഥാനിയല്ലെന്ന്
ജമ്മുകശ്മീരില് പിടിയിലായ ഭീകരന് പാക്കിസ്ഥാനിയല്ലെന്ന വാദവുമായി പാക്കിസ്ഥാന് രംഗത്ത്. മുഹമ്മദ് നാവേദ് എന്ന ഉസ്മാന് ഖാന് തങ്ങളുടെ പൗരനല്ല. ഇയാളെ കണ്ടിട്ട് പാക് പൗരനാണെന്ന് തോന്നുന്നില്ല. പാക് അധികൃതര് പറയുന്നു. ഇയാള് പാക്കിസ്ഥാനിലെ ഫൈസലാബാദ് സ്വദേശിയാണെന്നും ലഷ്ക്കര് ഭീകരനാണെന്നും കഴിഞ്ഞ ദിവസം തന്നെ വെളിവായിരുന്നു.
