655. വേദബീജസ്വരൂപാ – വേദബീജം സ്വരൂപമായവള്. എല്ലാ വേദങ്ങള്ക്കും ബീജം പ്രണവം എന്നു പ്രസിദ്ധമായ ഓംകാരമാണ്. സര്വ വേദങ്ങള്ക്കും സര്വജ്ഞാനത്തിനും ഉല്പത്തിസ്ഥാനമായ പ്രണവം ദേവിയുടെ സ്വരൂപമാണ്. ദേവിയായ ബീജത്തില്നിന്നു വേദങ്ങളുണ്ടായി.
ശ്രീകൃഷ്ണനെ വേദബീജസ്വരൂപനായി സ്തുതിക്കാറുണ്ട്. വേദമൂര്ത്തിയായ ശ്രീകൃഷ്ണഭഗവാനായി അവതരിച്ചതും സാവിത്രീദേവിയാണെന്നു വ്യാഖ്യാനിക്കാം.
656. സര്വദേവനമസ്കൃതാ – എല്ലാ ദേവന്മാരാലും നമസ്കരിക്കപ്പെടുന്നവള്.
657. ആദിദേവീ – എല്ലാത്തിനും ആദികാരണമായ ദേവി. എല്ലാത്തിനും മുമ്പുള്ളവള്. ഉല്പത്തിയില്ലാത്തവള്. ആദിശക്തിയായ പരാശക്തി.
658. ഗുണാധാരാ – ഗുണങ്ങള്ക്ക് ആധാരമായവള്. പ്രപഞ്ചകാരണമായ മൂന്നു ഗുണങ്ങളാണ് സത്വം, രജസ്സ്, തമസ്സ് എന്നിവ.
ആദിപരാശക്തി സൃഷ്ടികള്ഹറ ആരംഭിച്ചപ്പോള് പുരുഷന്, പ്രകൃതി എന്നു രണ്ടായി പിരിഞ്ഞ കാര്യം മുമ്പു പറഞ്ഞിരുന്നു. പ്രകൃതി ആദ്യമായി ത്രിഗുണങ്ങളെ സൃഷ്ടിച്ചു. തുടര്ന്ന് പഞ്ചഭൂതങ്ങളെ നിര്മ്മിച്ചു. ഗുണങ്ങളെയും ഭൂതങ്ങളെയും കൂട്ടിചേര്ത്ത് പ്രപഞ്ചത്തെയും സൃഷ്ടിച്ചു. സൃഷ്ടിയുടെ അടിസ്ഥാനഘടകങ്ങളായ ത്രിഗുണങ്ങള്ക്ക് കാരണമായ മൂലപ്രകൃതിയായി ദേവിയെ ഈ നാമം സ്തുതിക്കുന്നു.
659. ഭുവര്ലോകവ്യവസ്ഥിതാ – ഭുവര്ലോകത്തില് സ്ഥിതിചെയ്യുന്നവള്. ഭൂമിക്കു മുകളിലുള്ള ഒരു ലോകമാണു ഭുവര്ലോകം. അവിടെ പിതൃക്കളുടെ സംരക്ഷകയായി ദേവി സ്വധാരൂപത്തില് സ്ഥിതിചെയ്യുന്നതായി കരുതപ്പെടുന്നു.
ഭൂമിക്കും സൂര്യനും ഇടയ്ക്കുള്ള അന്തരീക്ഷത്തിനും ഭുവര് ലോകം എന്നുപറയും. സൂര്യന്റെ തീക്ഷണകിരണങ്ങള് ഭൂമിയിലുള്ള ജീവികളെ എരിച്ചുകളയാതെ സംരക്ഷിച്ചുകൊണ്ട് അന്തരീക്ഷത്തില് സാവിത്രീദേവി സ്ഥിതിചെയ്യുന്നു.
…തുടരും
