അബുജ: നൈജീരിയയില് ഈദ് ഷോപ്പിംഗിനിടെ വ്യാഴാഴ്ച മാര്ക്കറ്റിലുണ്ടായ ഇരട്ട സ്ഫോടനത്തില് കുറഞ്ഞത് 50 പേര് കൊല്ലപ്പെട്ടു. നിരവധി പേര്ക്ക് പരിക്കേറ്റു. വടക്കു കിഴക്കന് ഗോംബെ നഗരത്തിലാണ് സ്ഫോടനങ്ങള് നടന്നത്.
റമദാന് മാസത്തെ അവസാന നാളുകളിലേക്ക് കടന്നതോടെ പെരുന്നാള് ആഘോഷത്തിനായി മാര്ക്കറ്റില് വന് തിരക്കുണ്ടായിരുന്നു. ഒരു ചെരിപ്പ് കടക്ക് മുമ്പിലാണ് ആദ്യസ്ഫോടനമുണ്ടായത്. കുറച്ച് നിമിഷങ്ങള്ക്കുശേഷം ഒരു ചൈന ഷോപ്പിന് മുമ്പിലാണ് രണ്ടാമത്തെ സ്ഫോടനമുണ്ടായത്.
മരിച്ചവരില് ഏറെയും കുട്ടികളാണെന്ന് ദൃക്സാക്ഷികള് പറയുന്നു. മാര്ക്കറ്റിലുടെനീളം മൃതദേഹങ്ങള് ചിതറിക്കിടക്കുകയാണ്. ബൊക്കോ ഹറാം ഭീകരന്മാരാണ് ആക്രമണത്തിന് പിന്നിലെന്ന് കരുതുന്നു. പ്രസിഡന്റ് മുഹമ്മൂദ് ബുഹാരി ചുമതലയേറ്റ നാള്മുതല് രാജ്യത്ത് ബൊക്കോ ഹറാം ഭീകരര് ആക്രമണം ശക്തിപ്പെടുത്തിയിരിക്കുകയാണ്.
വടക്കു കിഴക്കന്മേഖലയിലെ തീവ്രവാദികളെ അടിച്ചമര്ത്തുന്നതിനായി സര്ക്കാര് കഴിഞ്ഞ ദിവസം പുതിയ സൈനിക മേധാവികളെ നിയമിച്ചിരുന്നു. ഗോബെയിലെ ബസ് സ്റ്റേഷനുകളിലും മറ്റും മുന്പ് ബൊക്കോ ഹറാം ഭീകരര് ആക്രമണം നടത്തിയിട്ടുണ്ട്.
