കഥാരംഭം
സീതാപതിയായ ശ്രീരാമചന്ദ്രന് പരശുരാമന്റെ അഹങ്കാരം ശമിപ്പിച്ച് താതനോടും മാതാക്കളോടും ബന്ധുക്കളോടുംകൂടി അയോദ്ധ്യയില് പ്രവേശിച്ചു. പൗരജനങ്ങള് ആഹ്ലാദപുരസ്സരം വന്നെതിരേറ്റു. അങ്ങനെ ബാല്യവും കൗമാരവും പിന്നീട് രണ്ടാമത്തെ ആശ്രമമായ ഗൃഹസ്ഥാശ്രമത്തില് പ്രവേശിച്ചു. പിതാവിനെ രാജ്യകാര്യങ്ങളില് സഹായിച്ചുതുടങ്ങി. സര്വ്വഗുണഗണങ്ങളും തികഞ്ഞ ശ്രീരാമചന്ദ്രന് ജനങ്ങള്ക്കു പ്രിയങ്കരനാകാന് അധികകാലം വേണ്ടിവന്നില്ല. അവര്ക്കെല്ലാം സൗഖ്യമുണ്ടായി. അയോദ്ധ്യ വൈകുണ്ഡപുരിക്കു സമമായിത്തീര്ന്നു. ഇങ്ങനെയാണ് അദ്ധ്യാത്മരാമായണത്തില് അയോദ്ധ്യകാണ്ഡം തുടങ്ങുന്നത്.
ശ്രീരാമന്റെ ഗുണവര്ണ്ണനം
വാല്മീകി രാമായണത്തില് ഈ കാണ്ഡം ആരംഭിക്കുന്നത് ഇങ്ങനെയാണ്.
ഗച്ഛതാ മാതുലകുലം ഭരതേന തദാ ള നഘഃ
ശത്രുഘ്നോ നിത്യശത്രുഘ്നോ നീതഃ പ്രീതിപുരസ്കൃതഃ
സ തത്ര ന്യവസദ് ഭ്രാതാ സഹ സത്കാരസത്കൃതഃ
മാതുലേനാശ്വപതിനാ പുത്രസ്നേഹേന ലാളിതഃ
(അപ്പോള് ഭരതന് ശത്രുഹന്താവായ ശത്രുഘ്നനെ പ്രീതിപൂര്വ്വം മാതുലഗൃഹത്തിലേക്കു കൂട്ടിക്കൊണ്ടുപോയി. അവിടെ പലവിധത്തിലുള്ള സത്കാരങ്ങള് സ്വീകരിച്ചുകൊണ്ടും അശ്വപതിയായ അമ്മാവന്റെ പുത്രസ്നേഹത്തോടുകൂടിയ ലാളനകള് അനുഭവിച്ചുകൊണ്ടും അനുജനോടൊപ്പം വസിച്ചു.
ദശരഥനാകട്ടെ മക്കളില് രാമനോടായിരുന്നു അധികം പ്രിയം. രാമനാകട്ടെ ദശരഥനെപ്പോലെതന്നെ ഗുണഗണങ്ങളുള്ള അനുയോജ്യനായ പുത്രനുമായിരുന്നു. അദ്ദേഹം ശാന്തചിത്തനും എല്ലാവരോടും മധുരമായി സംസാരിക്കുന്നവനുമായിരുന്നു. ആരെങ്കിലും പരുഷമായി സംസാരിച്ചാലും അദ്ദേഹം മറുപടി പറയില്ല. ഉപദ്രവം ചെയ്യുന്നവരോടും ആത്മനിയന്ത്രണംകൊണ്ട് പൊറുക്കും. ബുദ്ധിമാനും മധുരമായി സംസാരിക്കുന്നവനും വീര്യവാനുമായിരുന്ന രാമന് സത്യസന്ധനും വിദ്വാനും വൃദ്ധന്മാരെ ആദരിക്കുന്നവനുമായിരുന്നു. ദയാലുവും ക്രോധത്തെ കീഴടക്കിയവനും, ദുഃഖിതരില് കരുണയുള്ളവനും ധര്മ്മജ്ഞനും, ശുദ്ധനുമായിരുന്നു. അദ്ദേഹം രോഗരഹിതനും വാക്സാമര്ത്ഥ്യമുള്ളവനും ഓരോ വ്യക്തിയുടേയും കഴിവു മനസ്സിലാക്കുന്നവനുമായിരുന്നു.
തന്റെ ഗുണഗണങ്ങള്കൊണ്ട് പ്രജകള്ക്ക് സ്വന്തം പ്രാണനെപോലെ പ്രിയങ്കരനായിരുന്ന രാമന് ധര്മ്മാര്ത്ഥ കാമമോക്ഷങ്ങളുടെ ആന്തരാര്ത്ഥം ഗ്രഹിച്ചിരുന്നവനും സജ്ജനരക്ഷകനും, ഉപകാരസ്മരണയുള്ളവനും, ന്യായാനുസരണം ശിക്ഷിക്കാന് സമര്ത്ഥനുമായിരുന്നു. ലളിതകലകളില് പണ്ഡിതനും ധനം വേണ്ടവിധത്തില് ഉപയോഗിക്കാനറിയുന്നവനും അസൂയയില്ലാത്തവനും, എതിര്ത്താല് പരാജയപ്പെടുത്താന് കഴിയാത്തവനും, എന്നാല് മത്സരബുദ്ധിയില്ലാത്തവനുമായിരുന്നു. ഒരു ജീവിക്കും അനാദരിക്കാന് കഴിയാത്തവനുമായ രാമനെ യുവരാജാവായി അഭിഷേകം ചെയ്യണമെന്ന് ദശരഥന് ആഗ്രഹിച്ചു. അതിനുശേഷം വാല്മീകി അഭിഷേകമന്ത്രണം വര്ണ്ണിക്കുന്നു.
… തുടരും
