മുംബൈ: ഏകദിനങ്ങളിലെ ബാറ്റിങ് ശൈലിയെക്കുറിച്ച് നായകന് എം.എസ്. ധോണി നടത്തിയ വിമര്ശനങ്ങള് ഉള്ക്കൊള്ളുന്നുവെന്നും അതിനനുസരിച്ച് പ്രകടനം മെച്ചപ്പെടുത്തുമെന്നും സിംബാബ്വെ പര്യടനത്തിനുള്ള ഇന്ത്യന് ടീമിന്റെ നായകന് അജിങ്ക്യ രഹാനെ. ബംഗ്ലാദേശ് പര്യടനം കഴിഞ്ഞ അധ്യായം. ഏകദിനങ്ങളില് ഭാവിയില് മികച്ച പ്രകടനം നടത്തുകയാണ് ഇനിയുള്ള ലക്ഷ്യമെന്നും രഹാനെ പറഞ്ഞു. സിംബാബ്വെയിലേക്ക് പോകും മുന്പ് മാധ്യമങ്ങളോട് സംസാരിക്കുകയായിരുന്നു അദ്ദേഹം. ഉപഭൂഖണ്ഡത്തിലെ മത്സരങ്ങളില് രഹാനെ സ്ട്രൈക്ക് കൈമാറുന്നില്ലെന്നായിരുന്നു ധോണിയുടെ പരാതി. ഇതേത്തുടര്ന്ന് ബംഗ്ലാദേശിനെതിരായ പരമ്പരയിലെ രണ്ടു മത്സരങ്ങളില് താരത്തെ കളിപ്പിച്ചില്ല.
ടീമംഗങ്ങളെ സീനിയര് എന്നോ, ജൂനിയര് എന്നോ വേര്തിരിച്ചു കാണാറില്ല. 15 പേരും ടീമിന് പ്രധാനം. എല്ലാവരും മികച്ച പ്രകടനം നടത്തിയാലെ ജയിക്കാനാകു. സിംബാബ്വെയില് പരമ്പര നേടാന് ശ്രമിക്കും. മികച്ച ടീമാണിത്. ഹര്ഭജന് സിങ്ങിന്റെ തിരിച്ചുവരവ് ഗുണം ചെയ്യും. അദ്ദേഹത്തിന്റെ ഉപദേശം തേടും- രഹാനെ പറഞ്ഞു.
സ്വയം ഓപ്പണറായി ഇറങ്ങുന്നതിനെക്കുറിച്ചും, സ്പെഷ്യലിസ്റ്റ് വിക്കറ്റ് കീപ്പര്മാരില്ലാത്തതിനെക്കുറിച്ചും വ്യക്തമായി പ്രതികരിക്കാന് രഹാനെ തയാറായില്ല. ഓപ്പണിങ് കാര്യത്തില് അവിടെയെത്തിയ ശേഷം പരിശീലകരായ സഞ്ജയ് ബംഗാര്, ഭരത് അരുണ്, ആര്. ശ്രീധര് എന്നിവരുമായി സംസാരിച്ച് തീരുമാനിക്കും. മുംബൈയ്ക്കും രാജസ്ഥാന് റോയല്സിനും വേണ്ടി ഓപ്പണ് ചെയ്ത പരിചയമുണ്ട്. കീപ്പര് സ്ഥാനത്തെക്കുറിച്ചുള്ള ചോദ്യം വിഷമമേറിയത്. സിംബാബ്വെയില് എത്തുമ്പോള് വ്യക്തമായ പദ്ധതികള് ലഭിക്കുമെന്നും രഹാനെ.
