ന്യൂദല്ഹി:സെന്റ് സ്റ്റീഫന്സ് കോളേജില് ഗവേഷക വിദ്യാര്ത്ഥിനിയെ പീഡിപ്പിച്ച സംഭവം ഒതുക്കിതീര്ക്കാനുള്ള പ്രിന്സിപ്പല് വല്സണ് തമ്പുവിന്റെ നീക്കത്തിനെതിരെ വ്യാപകപ്രതിഷേധം. വിദ്യാര്ത്ഥി സംഘടനകളുടെയും അധ്യാപകരുടെയും വനിതാസംഘടനകളുടെയും നേതൃത്വത്തില് പ്രതിഷേധ പ്രകടനങ്ങള് നടന്നു.പ്രതിഷേധങ്ങളില് ദല്ഹി സര്വകലാശാല വിദ്യാര്ത്ഥികളും അധ്യാപകരും പിന്തുണയുമായി ഒത്തുചേര്ന്നു.
പെണ്കുട്ടികളുടെ സുരക്ഷയെക്കുറിച്ച് രാജ്യംമുഴുവന് സംസാരിക്കുമ്പോള് സെന്റ് സ്റ്റീഫന്സ് കോളേജില് ഒരുവിദ്യാര്ത്ഥിനിക്ക് നീതിലഭിക്കാത്തത് നാണക്കേടാണെന്ന് വിദ്യാര്ത്ഥിനികള് പറഞ്ഞു.പ്രിന്സിപ്പല് വല്സണ് തമ്പു രാജിവെക്കണമെന്നും വിദ്യാര്ത്ഥിനിക്ക് നീതിലഭ്യമാക്കണമെന്നും വിവിധ വനിതാസംഘടനകള് ആവശ്യപ്പെട്ടു.
കോളേജിലെ രസതന്ത്ര വിഭാഗത്തിലെ അസിസ്റ്റന്റ് പ്രൊഫസര് സതീഷ് കുമാറാണ് വിദ്യാര്ത്ഥിനിയെ പീഡിപ്പിച്ചത്. പിഎച്ച്ഡി ഗവേഷണത്തില് വിദ്യാര്ത്ഥിനിയുടെ മേല്നോട്ടം വഹിക്കുന്നതും ഇയാളായിരുന്നു. പീഡനം പുറത്തുപറഞ്ഞാല് വിദ്യാര്ത്ഥിനിയുടെ മുഖത്ത് ആസിഡ് ഒഴിക്കുമെന്ന് സതീഷ് കുമാര് ഭീഷണിപ്പെടുത്തുകയും ചെയ്തിരുന്നു.
പീഡനം സംബന്ധിച്ച് പെണ്കുട്ടി പരാതിനല്കിയെങ്കിലും പ്രശ്നത്തെ ലളിതവത്ക്കരിച്ച് ഇല്ലാതാക്കുവാനാണ് തമ്പു ശ്രമിച്ചത്.തമ്പുവിന്റെ സംഭാഷണങ്ങള് റെക്കോര്ഡ് ചെയ്ത് വിദ്യാര്ത്ഥിനി പോലീസിന് കൈമാറിയിട്ടുണ്ട്.
അധ്യാപകനെതിരെ അടിയന്തിര നടപടിയെടുത്ത് ഗവേഷക മേല്നോട്ടസ്ഥാനത്തുനിന്നും നീക്കുവാനോ പ്രിന്സിപ്പല് തയ്യാറായിട്ടില്ല. അതേസമയം, ഏത് അന്വേഷണവും നേരിടുവാന് തയ്യാറാണെന്നും തമ്പു ഇന്നലെ പ്രതികരിച്ചത്.
