ന്യൂദല്ഹി: വിവിധ മന്ത്രാലയങ്ങളില്നിന്നും ഫയലുകള് ചോരുന്നത് തടയുന്നതിനായി കേന്ദ്ര സര്ക്കാര് നടപടികള് ഊര്ജ്ജിതമാക്കി. സുരക്ഷാപരിശോധനകള് കൂടുതല് കര്ശനമാക്കുന്നതിനും കേന്ദ്ര ജീവനക്കാര് ഉപയോഗിക്കുന്ന കംപ്യൂട്ടറുകള് നിരീക്ഷിക്കുന്നതിനും കേന്ദ്ര ആഭ്യന്തര മന്ത്രാലയം നിര്ദ്ദേശം നല്കിയിട്ടുണ്ട്.
വിവിധ മന്ത്രാലയങ്ങളിലെ ഇന്റര്നെറ്റ് കണക്ഷനുള്ള കംപ്യൂട്ടറുകളില് സ്വകാര്യ ജോലികള് ചെയ്യുന്നത് നിരോധിക്കും. ഫേസ്ബുക്ക് അടക്കമുള്ള സോഷ്യല് മീഡിയ സൈറ്റുകള് ഉപയോഗിക്കുന്നതിനും നിയന്ത്രണം കൊണ്ടുവരും. കേന്ദ്ര സര്ക്കാര് ഓഫീസുകളിലെ കംപ്യൂട്ടറുകളില് പെന്ഡ്രൈവുകളും എസ്ക്റ്റേണല് മെമ്മറി ഘടിപ്പിക്കാനുമുള്ള ഡ്രൈവുകള് നീക്കം ചെയ്യും. കംപ്യൂട്ടറുകളില് ജീവനക്കാര് ചെയ്യുന്നത് നിരീക്ഷിക്കുന്നതിനുള്ള സംവിധാനവും ഏര്പ്പെടുത്തും.
ഫോട്ടോകോപ്പികള് എടുക്കുമ്പോള് രേഖകള് ചോരുന്നില്ലെന്ന് ഉറപ്പുവരുത്തണം. ഇതിനായി മെഷീനിലെ കോപ്പികളുടെ എണ്ണം കണക്കാക്കാനുള്ള സംവിധാനം ഉപയോഗിക്കണം. സിസിടിവി ക്യാമറകള് കൂടുതല് സ്ഥാപിക്കണമെന്ന നിര്ദ്ദേശവും പുറപ്പെടുവിച്ചിട്ടുണ്ട്.
കോര്പ്പറേറ്റ് കമ്പനികള്ക്കുവേണ്ടി വിവിധമന്ത്രാലയങ്ങളില്നിന്നും രേഖകള് ചോര്ന്ന സംഭവത്തിന്റെ പശ്ചാത്തലത്തിലാണ് ഓഫീസുകളുടെ സുരക്ഷ ശക്തമാക്കാന് തീരുമാനം. പെട്രോളിയം മന്ത്രാലയത്തില്നിന്നു രഹസ്യരേഖകള് ചോര്ത്തിയ കേസില് നിരവധി പേരാണ് അറസ്റ്റിലായത്.
ഇതേ തുടര്ന്ന് ഓഫീസുകളില് നിരീക്ഷണം ശക്തമാക്കുകയും സുരക്ഷാ പരിശോധനകള് കൂടുതല് നിര്ബന്ധമാക്കുകയും ചെയ്തിരുന്നു. എന്നാല് ഇതെല്ലാം ഫലപ്രദമായി നടപ്പാക്കുന്നതിന്റെ ഭാഗമായാണ് കേന്ദ്ര ആഭ്യന്തരമന്ത്രാലയം പുതിയ മാര്ഗ്ഗ നിര്ദ്ദേശങ്ങള് പുറപ്പെടുവിച്ചത്. കുറ്റക്കാരായി കണ്ടെത്തുന്ന ജീവനക്കാര്ക്കെതിരെ കര്ശന നടപടികള് സ്വീകരിക്കുമെന്ന മുന്നറിയിപ്പും കേന്ദ്ര ആഭ്യന്തരമന്ത്രാലയം നല്കി.
