598. വിഷനാശിനീഃ – വിഷയത്തെ നശിപ്പിക്കുന്നവള്. മാനസീദേവിയുടെ ഭക്തരുടെ സ്പര്ശമോ നോട്ടമോ ഏറ്റാല് വിഷം അമൃതമായി മാറും. ദേവിയുടെ മന്ത്രം ചൊല്ലി പൂജിച്ച ഏതു വസ്തുവും വിഷബാധയെ നശിപ്പിക്കും. ദേവിയെ സ്മരിക്കുന്നവരെ സര്പ്പവിഷം ബാധിക്കുകയില്ല. അതിനാല് വിഷനാശിനീ എന്നു നാമം.
599. നാഗാഭരണശിഷ്യാഃ – നാഗങ്ങളെ ആഭരണമാക്കിയവന് നാഗാഭരണന്. നാഗങ്ങളെ ആഭരണമാക്കിയ ശ്രീപരമേശ്വരന്റെ ശിഷ്യയാണ് മനസാദേവി. ദേവി ആയിരംവര്ഷം തപസ്സുചെയ്ത് ശ്രീപരമേശ്വരനെ പ്രസാദിപ്പിച്ചു. ഭഗവാന് പ്രത്യക്ഷനായി ദേവിയെ ദിവ്യജ്ഞാനം കൊടുത്തനുഗ്രഹിച്ചു. ഭഗവാന് തന്നെ ദേവിയെ സാമവേദം പഠിപ്പിച്ചു. ശ്രീകൃഷ്ണനെ ആരാധിക്കാനുള്ള അഷ്ടാക്ഷരമന്ത്രവും ശ്രീകൃഷ്ണകവചവും ശിവന് ദേവിക്കു ഉപദേശിച്ചു. ഗുരുവായ ശ്രീപരമേശ്വരന്റെ നിര്ദ്ദേശമനുസരിച്ചാണ് ദേവി മൂന്നുയുഗം നീണ്ട തപസ്സുകൊണ്ട് ശ്രീകൃഷ്ണനെ പ്രസാദിപ്പിച്ചത്.
600. നാഗസത്രവിരാമദാഃ – നാഗസത്രം മുടക്കിയവള്. തക്ഷകന്റെ വിഷമേറ്റ് പരീക്ഷിത്തു മഹാരാജാവ് മരിച്ചതുകൊണ്ട് പരീക്ഷിത്തിന്റെ മകനായ ജനമേജയന് എല്ലാ സര്പ്പങ്ങളെയും നശിപ്പിക്കാനായി ഒരു യാഗം ആരംഭിച്ചു. സര്പ്പങ്ങള് കൂട്ടമായി യാഗാഗ്നിയില് വെന്തു മരിച്ചു. തക്ഷകന് ഇന്ദ്രന് അഭയം കൊടുത്തു. ഇതറിഞ്ഞ ഹോതാക്കള് ഇന്ദ്രനോടൊപ്പം തക്ഷകനെ ആവാഹിച്ചു. ദേവന്മാര് മാനസീദേവിയെ അഭയം പ്രാപിച്ചു. യാഗം നിര്ത്താന് ജനമേജയനെ പ്രേരിപ്പിക്കുന്നതിന് ദേവി തന്റെ പുത്രനായ ആസ്തീകനെ നിയോഗിച്ചു. ആസ്തീകന് യാഗശാലയിലെത്തി ജനമേജയനോട് യാഗം നിറുത്താന് നിര്ദ്ദേശിച്ചു. ജനമേജയന് അനുസരിച്ചു. സര്പ്പസത്രം അവസാനിപ്പിച്ചവളായി ദേവിയെ നാമം സ്തുതിക്കുന്നു.
… തുടരും
