അനുഗ്രഹസ്വരൂപനും വിഘ്നനിവാരകനും അഭീഷ്ടവരദായകനുമായ ശ്രീമഹാഗണപതി ലക്ഷ്മീസമേതനായി കുടികൊള്ളുന്ന ആദ്യത്തെ മഹാക്ഷേത്രമാണ് പെരുമ്പള്ളി ശ്രീലക്ഷ്മിവിനായക സരസ്വതീദേവിക്ഷേത്രം. ചിങ്ങമാസത്തിലെ വിനായകചതുര്ത്ഥിയാണ് ക്ഷേത്രത്തിലെ പ്രധാന ഉത്സവം. ഇതിനോടനുബന്ധിച്ച് ക്ഷേത്രത്തില് ശ്രീമദ് ഭാഗവതസപ്താഹവും പ്രാര്ത്ഥനാപൂര്വ്വം അനുഷ്ഠിച്ചുവരുന്നു.
കൂടാതെ എല്ലാ തിങ്കളാഴ്ച ദിവസവും മാസത്തിലെ മകയിരം നക്ഷത്രവും ക്ഷേത്രത്തിലെ പ്രധാന്യമുള്ള ദിവസങ്ങളാണ്. കണ്ണമംഗലം ദാമോദരന് നമ്പൂതിരിയാണ് ക്ഷേത്രതന്ത്രി. കായംകുളത്തുനിന്നും ആറ് കിലോമീറ്റര് പടിഞ്ഞാറ് കായംകുളം കായലിനും കടലിനും ഇടയിലുള്ള ഭൂപ്രദേശത്താണ് ഈ മഹാക്ഷേത്രം സ്ഥിതി ചെയ്യുന്നത്. തീരദേശപാതയിലൂടെ എത്തുന്നവര്ക്ക് തൃക്കുന്നപ്പുഴ വലിയഴീക്കല് റോഡിലൂടെ പെരുമ്പള്ളി ജംഗ്ഷനിലെത്തിയാല് ക്ഷേത്രത്തില് എത്തിച്ചേരാം.
ക്ഷേത്രത്തിലെ വരുമാനത്തിന്റെ ഏറിയ പങ്കും ജീവകാരുണ്യപ്രവര്ത്തനങ്ങള്ക്കായാണ് ഉപയോഗിക്കുന്നത്. എല്ലാ വര്ഷവും 151 അമ്മമാരുടെ മാതൃവന്ദനവും, നക്ഷത്രവൃക്ഷം പദ്ധതി എന്നിവയും നടത്തുന്നു. എല്ലാ മാസവും രോഗാതുരരായവരെ സഹായിക്കുന്നതില് ക്ഷേത്രം മുന്തൂക്കം നല്കുന്നു. നിര്ദ്ധനരായിട്ടുള്ള മിടുക്കരായ വിദ്യാര്ത്ഥികള്ക്ക് വിദ്യാഭ്യാസസഹായവും അവശത അനുഭവിക്കുന്ന ഭാഗവതപാരായണക്കാര്ക്ക് ക്ഷേത്രത്തിന്റെ പേരില് ധനസഹായവും നല്കിവരുന്നു. കൂടാതെ വേദപഠനത്തിനായുള്ള ക്ലാസുകളും വിദ്യാസരസ്വതിയുടെമുന്നില് നടന്നുവരുന്നു.
