അലഹബാദ്:ഉത്തര്പ്രദേശില് മാധ്യമ പ്രവര്ത്തകനെ ചുട്ടുകൊന്നതിനെ ന്യായീകരിച്ച് മറ്റൊരു മന്ത്രികൂടി രംഗത്തെത്തിയതോടെ സംഭവം കൂടുതല് വിവാദത്തിലേക്ക്. മാധ്യമപ്രവര്ത്തകന്റെ കൊല പ്രകൃതിയുടെ തീരുമാനമാണെന്നാണ് പുഷ്പ്പകൃഷി മന്ത്രി പരാശ്നാഥ് യാദവ് ഇന്നലെ പറഞ്ഞത്. ചിലകാര്യങ്ങള് പ്രകൃതിക്ക് വിധേയമാണ് നിങ്ങള്ക്കിത് തടയുവാനാവില്ലെന്നാണ് മന്ത്രി പറഞ്ഞത്.
ഉത്തര്പ്രദേശ് മന്ത്രി റാം മൂര്ത്തിയും സംഘവുമാണ് മാധ്യമപ്രവര്ത്തകന് ജാഗേന്ദ്ര സിങ്ങിനെ ചുട്ടുകൊന്നത്. സംഭവത്തില് പ്രതിഷേധം ശക്തമാകുന്ന സാഹചര്യത്തിലാണ് വിവാദ പ്രസ്താവനയുമായി മന്ത്രി രംഗത്തെത്തിയത്. എഫ്ഐആറില് പേര് പരാമര്ശിക്കപ്പെട്ടതിനെ തുടര്ന്ന് റാം മൂര്ത്തി ഒളിവിലാണ്. മന്ത്രിയെ അറസ്റ്റുചെയ്യാത്തതില് പ്രതിഷേധിച്ച് ബിജെപിയുടെ നേതൃത്വത്തില് വന്പ്രതിഷേധം ഉയര്ത്തിയിരുന്നു.
മന്ത്രി റാം മൂര്ത്തിക്കെതിരെ സോഷ്യല് മീഡിയയില് പ്രചാരണം നടത്തിയതിന്റെ പേരിലാണ് ജൂണ് ഒന്നാം തീയതി മന്ത്രിയുടെ നേതൃത്വത്തില് ആക്രമണം നടന്നത്. ജാഗേന്ദ്ര സിങ്ങിനെ വീട്ടിലെത്തി മണ്ണെണ്ണ ഒഴിച്ച് തീകൊളുത്തുകയായിരുന്നു. ഗുരുതരമായി പൊള്ളലേറ്റ് ലക്നൗ ആശുപത്രിയില് ചികിത്സയില് കഴിഞ്ഞിരുന്ന സിങ് കഴിഞ്ഞ ആഴ്ചയാണ് മരിച്ചത്.
ഇതിന്റെ തുടര്ച്ചയെന്നോണം പിലിഭിത്തില് മറ്റൊരു പത്രപ്രവര്ത്തകനായ ഹൈദര് ഖാനെ ബൈക്കില് കെട്ടിവലിച്ചിഴച്ച് മര്ദ്ദിക്കുകയായിരുന്നു.
ഗുരുതരമായി പരിക്കേറ്റ മാധ്യമപ്രവര്ത്തകനെ ആശുപത്രിയില് പ്രവേശിപ്പിച്ചു. ഞായറാഴ്ച വൈകുന്നേരം ആറോടെയാണു സംഭവം. മോഷണ കേസിലെ പ്രധാനസാക്ഷി അപകടത്തില്പെട്ടു കിടക്കുന്നുവെന്ന ഫോണ് കോളിനെത്തുടര്ന്നു സ്ഥലത്തു എത്തിയപ്പോള് ഹൈദറിനെ നാലംഗ സംഘം മര്ദ്ദിക്കുകയായിരുന്നു. മാധ്യമപ്രവര്ത്തകന്റെ പരാതിയില് പോലീസ് കേസെടുത്ത് അന്വേഷണം ആരംഭിച്ചു.
മാധ്യമ പ്രവര്ത്തകനെ ചുട്ടുകൊന്ന കേസില് സിബിഐ അന്വേഷണം വേണമെന്ന ആവശ്യം ശക്തമാകുന്നതിനിടെയാണു മാധ്യമപ്രവര്ത്തകനെതിരേ വീണ്ടും ആക്രമണം ഉണ്ടായിരിക്കുന്നത്. ഇതോടെ സമാജ്വാദി സര്ക്കാരിനെതിരെ പ്രതിഷേധം ശക്തമായിരിക്കുകയാണ്.
