ചാത്തന്നൂര്: കശുവണ്ടി പരിപ്പുമായി വന്ന ലോറിയുമായി കൂട്ടിയിടിച്ച് മാരുതികാര് കത്തിനശിച്ചു. കൊല്ലം-തിരുവന്തപുരം ദേശീയ പാതയില് കാരംകോട് ശീമാട്ടി ജംഗ്ഷന് സമീപം ഇന്നലെ ഉച്ചയോടെയായിരുന്നു സംഭവം. കൊല്ലത്ത് നിന്ന് തിരുവനന്തപുരത്തേക്ക് പോവുകയായിരുന്ന കാര് അമിത വേഗത്തില് മറ്റൊരു വാഹനത്തെ മറികടക്കുന്നതിനിടെ എതിര് ദിശയില് വന്ന ലോറിയില് ഇടിക്കുകയായിരുന്നു.
അപകടം നടന്ന് അഞ്ചുമിനിട്ടിനുള്ളില് കാര് കത്തി അമര്ന്നു. അതിനു മുമ്പ് തന്നെ ഓടിക്കൂടിയവര് കാറിനുള്ളിലുള്ളവരെ പുറത്തെടുത്തതിനാല് വന് അപകടം ഒഴിവായി. കാറിനുള്ളിലുണ്ടായിരുന്നവരെ ചാത്തന്നൂരിലെ സ്വകാര്യ ആശുപത്രിയില് പ്രവേശിപ്പിച്ചു. ടെമ്പോവാനിലുണ്ടായിരുന്നവര്ക്ക് യാതൊരു പരുക്കുും സംഭവിച്ചില്ല.
ഇടിയുടെ ആഘാതത്തില് ടെമ്പോവാനിന്റെ വീലുകള് ഊരി പോയി വണ്ടി മറിയുകയും ചെയ്തു. കാര് പൂര്ണമായി കത്തിനശിച്ചതിനു ശേഷമാണ് പരവൂരില് നിന്ന് ഫയര്ഫോഴ്സ് എത്തിയത്. അപകടത്തെത്തുടര്ന്ന് ദേശീയപാതയില് അര മണിക്കുറോളം ഗതാഗതം തടസപ്പെട്ടു.
