കൊട്ടാരക്കര: ശാന്തിഗിരി ആശ്രമത്തിന്റെ യുവജന സംഘടനയായ ശാന്തിമഹിമയുടെ ദക്ഷിണമേഖലാ ക്യാമ്പിനും യുവസംഗമത്തിനും കൊട്ടാരക്കര ശാന്തിഗിരി ആശ്രമം വേദിയായി. ക്യാമ്പില് തിരുവനന്തപുരം, കൊല്ലം, പത്തനംതിട്ട, കോട്ടയം ജില്ലകളിലെ മുന്നൂറോളം പ്രവര്ത്തകര് പങ്കെടുത്തു.
ക്യാമ്പിന്റെ ഉദ്ഘാടനം റിട്ട.ഡിസ്ട്രിക്റ്റ് സെഷന്സ് ജഡ്ജ് മുരളീശ്രീധര് നിര്വഹിച്ചു. ശാന്തിഗിരി ആശ്രമം കൊല്ലം ജില്ലാ ഇന്ചാര്ജ് സ്വാമി സായൂജ്യനാഥ് ജ്ഞാനതപസ്വി അദ്ധ്യക്ഷത വഹിച്ച ചടങ്ങില് സ്വാമി ചിത്തശുദ്ധന് ജ്ഞാന തപസ്വി മുഖ്യ പ്രഭാഷണം നടത്തി. സ്വാമി ഗുരുനന്ദ് ജ്ഞാന തപസ്വി, സ്വാമി ജയപ്രിയന് ജ്ഞാനതപസ്വി എന്നിവര് വിവിധ വിഷയങ്ങളില് ക്ലാസുകളെടുത്തു.
യുവജനസംഗമത്തിന്റെ ഭാഗമായി വൈകുന്നേരം പഠനയാത്ര സംഘടിപ്പിച്ചു.
ക്യാമ്പിന്റെ സമാപന ദിവസമായ ഇന്നലെ രാവിലെ 6ന് മെഡിറ്റേഷനും തുടര്ന്ന് വ്യക്തിത്വ വികസനം, മാറുന്ന സമൂഹവും യുവതലമുറയും, മണ്ണു മനുഷ്യനും എന്നീ വിഷയങ്ങളില് ചര്ച്ചയും പരിസ്ഥിതി സൗഹൃദവും ആരോഗ്യവും എന്നീ വിഷയങ്ങളില് സെമിനാറും നടന്നു. തുടര്ന്ന് ക്യാമ്പ് അവലോകനം, കുട്ടികളുടെ കലാപരിപാടികള് എന്നിവ ഉണ്ടായിരുന്നു.
