സോള്‍: ഉത്തര കൊറിയയുടെ പ്രതിരോധവിഭാഗം തലവനെ രാജ്യദ്രോഹ കുറ്റം ആരോപിച്ച് വധശിക്ഷയ്‌ക്ക് വിധേയനാക്കി. പിതാവിന്റെ മരണത്തിന് ശേഷം 2011 ല്‍ കിം ജോങ് ഉന്‍ അധികാരമേറ്റതിന് ശേഷം ശുദ്ധീകരണ പ്രക്രിയകളാണ് നടത്തുന്നത്. ഇതിന്റെ ഭാഗമായാണ് ഇപ്പോഴത്തെ വധശിക്ഷ.
പ്രതിരോധതലവന്‍ ജനറല്‍ ഹ്യോന്‍ യോങ് ഷോളിനെയാണ് വധശിക്ഷയ്‌ക്ക് വിധേയനാക്കിയത്. നൂറ്കണക്കിന് ആളുകളെ സാക്ഷിയാക്കി വിമാനവേധ തോക്കുപയോഗിച്ച് പരസ്യമായി വെടിവെച്ച് കൊല്ലുകയായിരുന്നു.
ഉത്തരകൊറിയയുടെ തലസ്ഥാനമായ പ്യോങ് യാങ്ങില്‍ ഏപ്രില്‍ 30 നാണ് വധശിക്ഷ നടപ്പാക്കിയതെന്നാണ് ദക്ഷിണകൊറിയയിലെ രഹസ്യാന്വേഷണ ഉദ്യോഗസ്ഥര്‍ പാര്‍ലമെന്റ് അംഗങ്ങളെ അറിയിച്ചത്. തന്റെ അധീശ്വത്തെ ചോദ്യം ചെയ്ത 15 ഉന്നത ഉദ്യോഗസ്ഥരെ കിം ജോങ് ഉന്‍ വധശിക്ഷയ്‌ക്ക് വിധേയരാക്കിയിരുന്നു.
ഉത്തര കൊറിയയുടെ ആഭ്യന്തര രാഷ്‌ട്രീയം ഈ ദിവസങ്ങളില്‍ കലങ്ങി മറിയുകയാണെന്ന് ചൂണ്ടിക്കാണിക്കപ്പെടുന്നു. കിം ജോങ് ഉന്നിന്റെ നേതൃത്വം വളരെ അപകടത്തിലാണെന്നും ഉത്തര കൊറിയയുടെ നിലനില്‍പ്പ് തന്നെ ചോദ്യംചെയ്യപ്പെടുകയാണെന്നും ചൂണ്ടിക്കാണിക്കപ്പെടുന്നു.
കിം ജോങ് ഉന്നിനെ ആരും തന്നെ ബഹുമാനിക്കുന്നില്ല. രാഷ്‌ട്രത്തലവന്‍ കിം ജോങ് ഉന്നിനോട് അനാദരവ് കാട്ടിയതിനും അദ്ദേഹം പങ്കെടുത്ത യോഗത്തില്‍ ഉറങ്ങിയതിനുമാണ് ശിക്ഷയെന്നാണ് ഇപ്പോഴത്തെ വധശിക്ഷയെക്കുറിച്ച് പറയുന്നത്. ഉത്തര കൊറിയുടെ വൈസ് മാര്‍ഷല്‍ പദവിയിലേക്ക് 2012ല്‍ ഹ്യോന്‍ യോങിനെ ഉയര്‍ത്തിയിരുന്നു.
