ന്യൂദല്ഹി: ഭാരതത്തിന്റെ സ്വന്തം സാമ്പത്തിക മേഖലയില് വരുന്ന, 12 നോട്ടിക്കല് മൈലിന് അപ്പുറമുള്ള സമുദ്രത്തില് മല്സ്യങ്ങളുടെ പ്രജനനകാലത്ത് 61 ദിവസമായിരിക്കും മീന്പിടിത്ത നിരോധനമെന്ന് കേന്ദ്രസര്ക്കാര് വ്യക്തമാക്കി. 12 നോട്ടിക്കല് മൈല്വരെ മീന്പിടിത്തം നിരോധിക്കാന് അതത് സംസ്ഥാനങ്ങള്ക്കാണ് അധികാരം. അത് അവര് കാലാകാലങ്ങളില് ചെയ്യുന്നുമുണ്ട്.കാര്ഷിക മന്ത്രാലയം പത്രക്കുറിപ്പില് അറിയിച്ചു.
ഭാരതത്തിന്റെ സമുദ്രത്തില് വിദേശകപ്പലുകള് മീന്പിടിക്കാന് കേന്ദ്രസര്ക്കാര് ഒരുതരത്തിലും അനുവദിക്കില്ല. കേന്ദ്രം ഇത് അനുവദിച്ചെന്ന പ്രചാരണമാണ് നടക്കുന്നത്. ഇത് തെറ്റായ പ്രചാരണമാണ്.യുപിഎ സര്ക്കാര് നിയമിച്ച കമ്മിറ്റിയാണ് വിദേശകപ്പലുകള് അനുവദിക്കണമെന്ന് നിര്ദ്ദേശിച്ചത്. ഈ റിപ്പോര്ട്ട് എന്ഡിഎ സര്ക്കാര് പരിഗണിച്ചിട്ടുപോലുമില്ല. ഭാരത സമുദ്രത്തില് ഏതെങ്കിലും വിദേശകപ്പല് പീന്പിടിച്ചാല് തീരദേശരക്ഷാസേന അതിനെ ശക്തമായി തന്നെ നേരിടും. കപ്പല് പിടിച്ചെടുക്കും, ജീവനക്കാരെ അറസ്റ്റ് ചെയ്യും, കേന്ദ്രം വ്യക്തമാക്കി.
2013 ആഗസ്റ്റിലാണ് യുപിഎ സര്ക്കാര് മീനാകുമാരി കമ്മിറ്റിയെ നിയോഗിച്ചത്. ഭാരതസമുദ്രത്തില് വിദേശ കപ്പലുകളെയും സംയുക്ത സംരംഭം നടത്തുന്ന കപ്പലുകളെയും മീന്പിടിക്കാന് അനുവദിക്കണമെന്നായിരുന്നു കമ്മിറ്റി ശുപാര്ശ. എന്നാല് തീരദേശ സര്ക്കാരുകളുമായും മന്ത്രിമാരുമായും ഉദ്യോഗസ്ഥരുമായും ചര്ച്ചകള് നടത്തിയ മോദി സര്ക്കാര് മീനാകുമാരി കമ്മറ്റി ശുപാര്ശ തള്ളുകയാണ് ചെയ്തത്.
12 നോട്ടിക്കല് മൈല്വരെ അതത് സംസ്ഥാനങ്ങളുടെ അധികാരപരിധിയിലാണ്. അവിടങ്ങളില് അതത് സംസ്ഥാനങ്ങള് മീന്പിടിത്തം വിലക്കാറുമുണ്ട്. ബംഗാള്, ആന്ധ്രാ, തമിഴ്നാട്, കേരളം തുടങ്ങിയ സംസ്ഥാനങ്ങള് 47 ദിവസവും ഗുജറാത്ത്, മഹാരാഷ്ട്ര, ഗോവ തുടങ്ങിയ സംസ്ഥാനങ്ങള് 67 ദിവസവുമാണ് മീന്പിടിത്തം വിലക്കുന്നത്. ദാമന്ദിയുവില് വിലക്ക് 75 ദിവസമാണ്. കര്ണ്ണാടകത്തില് 57 ദിവസവും, ഒഡീഷയില് 60 ദിവസവും.
2015 മാര്ച്ച് 18ന് ചേര്ന്ന കേന്ദ്രകൃഷിമന്ത്രിയും സംസ്ഥാനമന്ത്രിമാരും പങ്കെടുത്ത യോഗം അതേ കാലയളിവില് മീന്പിടിത്തം നിരോധിക്കാനാണ് തീരുമാനിച്ചത്. കിഴക്കന് തീരത്ത് ഏപ്രില് പതിനഞ്ചു മുതലും പടിഞ്ഞാറന് തീരത്ത് ജൂണ് ഒന്നുമുതലുമാണ് വിലക്ക്.
12 നോട്ടില് മൈലിന് അപ്പുറത്തുള്ള, കേന്ദ്രത്തിന്റെ പരിധിയിലുള്ള സമുദ്രത്തില് 47 ദിവസമായിരുന്നു വിലക്ക്. സംസ്ഥാനങ്ങളുടെ വിലക്കുസമയവും ഇതുമായി പൊരുത്തപ്പെട്ടിരുന്നില്ല. മാത്രമല്ല വിവിധ സംസ്ഥാനങ്ങളില് നിന്നുള്ളവര് ഈ പൊരുത്തക്കേട് മുതലടെുത്ത് കടന്നുകയറി മീന്പിടിക്കുന്നത് പ്രശ്നമാകുകയും ചെയ്തു.ഇതു പരിഗണിച്ചാണ് കേന്ദ്രത്തിന്റെ പരിധിയിലുള്ള സമുദ്രത്തില് 61 ദിവസം ഒരുപോലെ വിലക്ക് ഏര്പ്പെടുത്താന് തീരുമാനിച്ചത്.കേരളം ഒഴികെ എല്ലാ സംസ്ഥാനങ്ങളും ഇത് അംഗീകരിച്ചതുമാണ്.
മാത്രമല്ല കേരളം 88ല് 61 ദിവസവും 2006ല് 67 ദിവസവും മീന്പിടിത്തം വിലക്കിയിരുന്നതുമാണ്.കേന്ദ്രം പത്രക്കുറിപ്പില് വിശദീകരിച്ചു. മീന്സമ്പത്ത് സംരക്ഷിക്കകയാണ് ഒരു ലക്ഷ്യം. കാലവര്ഷക്കലത്ത് കടല് പ്രക്ഷുബ്്ധമാകുമ്പോള് മല്സ്യപ്രവര്ത്തകരുടെ ജീവനു സുരക്ഷിതത്വം നല്കാനും ഇത് ഉപകരിക്കും. കേന്ദ്രത്തിന്റെപരിധിയിലുള്ള സമുദ്രത്തിലെ വിലക്ക് 47 ല്നിന്ന് 61 ദിവസമാക്കാന് ശുപാര്ശ ചെയ്തത് കൊച്ചി സിഎംഎഫ്.ആര് ഡയറക്ടര് അധ്യക്ഷനായ ടെക്നിക്കല് കമ്മിറ്റിയാണ്. ഈ കമ്മറ്റിയും യുപിഎ സര്ക്കാരിന്റെ കാലത്ത് രൂപീകരിച്ചതാണ്, കേന്ദ്രം തുടര്ന്നു.
