473. രൂപരൂപാഃ രൂപമായി രൂപം ധരിച്ചവള്. 466-ാം നാമം ദേവിയെ ചക്ഷുരൂപയായി അവതരിപ്പിച്ചു. ചക്ഷുസ്സ് എന്നഅവയവം രൂപം കണ്ടറിയാനുള്ള ഉപകരണമാണ്. പ്രകൃതിയിലുള്ള എല്ലാത്തിനും രൂപമുണ്ട്. ഓരോ വസ്തുവിനും ജീവിക്കും നിയതമായ രൂപഘടനയുണ്ട്. എല്ലാ രൂപവും കാണാന് എല്ലാ കണ്ണുകള്ക്കും കഴിവില്ല. ഒന്നിനെ മറ്റുള്ളവയില്നിന്നു വേര്തിരിച്ചറിയാന് സഹായിക്കുന്ന സ്വഭാവങ്ങളില് ഒന്ന് രൂപമാണ്. വസ്തുക്കളില് രൂപമായി വര്ത്തിക്കുന്നത് പ്രപഞ്ചകാരണമായ മൂകാംബികാദേവിയാണ്.
474. ശബ്ദരൂപാഃ ശബ്ദമായി രൂപം ധരിച്ചവള്. 467-ാം നാമം ശ്രോത്രരൂപാ എന്നായിരുന്നു. ശബ്ദതരംഗങ്ങളായി ബാഹ്യലോകത്തെക്കുറിച്ചുള്ള അറിവ് ജീവിക്ക് കൊടുക്കുന്നത് ശബ്ദമായി രൂപം സ്വീകരിച്ച ദേവിയാണ്. ശബ്ദവും ശബ്ദം സ്വീകരിക്കുന്ന ശ്രോത്രവും ദേവിതന്നെ.
475. സ്പര്ശരൂപാഃ സ്പര്ശമായി രൂപം പൂണ്ടവള്. 468-ാം നാമം ത്വഗ്രൂപാ എന്നായിരുന്നു. ശരീരത്തെ ആവരണം ചെയ്തു രക്ഷിക്കുകയും ചൂട്, തണുപ്പ്, പരുപരുപ്പ്, മാര്ദ്ദവം തുടങ്ങിയവയെക്കുറിച്ചുള്ള അവബോധം തരുകയും ചെയ്യുന്നു. ത്വക്കിന്റെ പ്രവൃത്തി മുഖ്യമായും സ്പര്ശമാണ്. സ്പര്ശിക്കുമ്പോഴാണ് ഈ വിവരങ്ങള് ലഭിക്കുന്നത്. ത്വക്കായും സ്പര്ശമായും രൂപം ധരിക്കുന്നതും ജഗദ്രുപയായ ദേവിതന്നെ.
476. രസാത്മികാഃ രസം രൂപമായവള്. 469-ാം നാമം രസനാത്മികാ എന്നായിരുന്നു. നാക്കായി ഉപ്പ്, പുളിപ്പ്, മധുരം, കയ്പ് തുടങ്ങിയ രുചികള് തിരിച്ചറിയുന്നതും പല രസങ്ങളായി ആഹാരത്തിന്റെ നേര്ക്ക് ആഭിമുഖ്യമുണ്ടാക്കി ശരീരത്തെ പോഷിപ്പിക്കുന്നതും രസങ്ങള്ക്കും രസനയ്ക്കും കാരണമായ ജഗദംബയാണ്.
…. തുടരും
