തിരുവനന്തപുരം: സെക്രട്ടേറിയറ്റ് മാര്‍ച്ചിനിടെ ബ്ലേഡ് ഉപയോഗിച്ചതിന് എസ്എഫ്‌ഐ ജില്ല പ്രസിഡന്റ് നന്ദന്‍ അറസ്റ്റില്‍.എസ്എഫ്‌ഐ സംസ്ഥാന നേതാക്കള്‍ അടക്കം കണ്ടാലറിയാവുന്ന 100 പേര്‍ക്കെതിരെയാണ് കേസെടുത്തിട്ടുളളത്.
നേരത്തെ സംസ്ഥാന ഭാരവാഹികള്‍ അടക്കം 10 പേര്‍ക്കെതിരെ പൊലീസ് കേസെടുത്തിരുന്നു.ബ്ലേഡ് ഉപയോഗിച്ച് ബാരിക്കേഡ് കെട്ടിയ കയര്‍ അറുത്തുവെന്നുമാണ് എഫ്‌ഐആര്‍. ഈ പ്രവൃത്തി മൂലം പതിനായിരം രൂപയുടെ നഷ്ടമുണ്ടായി.
സഹകരണമേഖലയിലെ വിദ്യാഭ്യാസ സ്ഥാപനങ്ങളിലെ ഫീസ് വര്‍ദ്ധന പിന്‍വലിക്കണമെന്നാവശ്യപ്പെട്ട് എസ്എഫ്‌ഐ സെക്രട്ടേറിയറ്റിലേക്ക് നടത്തിയ മാര്‍ച്ചിലായിരുന്നു സംഘര്‍ഷം. യൂണിവേഴ്‌സിറ്റി കോളേജില്‍ നിന്നും സമരം തുടങ്ങിയപ്പോള്‍ സമരക്കാര്‍ മുഖ്യമന്ത്രി വി ഡി സതീശന്റെ ഫ്‌ലക്‌സ് ബോര്‍ഡും കൊടികളും നശിപ്പിച്ചു. ബാരിക്കേഡ് തള്ളിമാറ്റാന്‍ ശ്രമിച്ചപ്പോള്‍ പൊലിസ് ജലപീരങ്കി പ്രയോഗിച്ചു.
പ്രവര്‍ത്തകരെ പിരിച്ചുവിടാന്‍ നാലു പ്രാവശ്യം പൊലീസ് ലാത്തിവീശി. ഇതിനിടെ നിലത്ത് വീണ ബ്ലയ്ഡുകള്‍ ആണ് കേസിനാധാരം.കള്ളക്കേസെടുക്കാന്‍ പൊലീസ് കൊണ്ടിട്ടതാണ് ബ്ലെയ്ഡുകളെന്നാണ് എസ്എഫ്‌ഐയുടെ ആരോപണം. എന്നാല്‍ ബാരിക്കേഡ് കെട്ടിയ കയര്‍ മുറിക്കാന്‍ എസ് എഫ്‌ഐക്കാര്‍ കൊണ്ടുവന്നതാണെന്ന് പൊലിസ് പറഞ്ഞു.
