ന്യൂദല്ഹി : ഭാരതത്തിന്റെ തെറ്റായ ഭൂപടം ചാനലിലൂടെ പ്രദര്ശിപ്പിച്ചെന്ന കുറ്റത്തില് അന്താരാഷ്ട്ര വാര്ത്താ ചാനലായ അല്ജസീറയോട് അഞ്ചുദിവസത്തേയ്ക്കുള്ള സംപ്രേഷണം തടഞ്ഞു. പലതവണ മുന്നറിയിപ്പ് നല്കിയിട്ടും തെറ്റായ ഭൂപടം പ്രദര്ശിപ്പിച്ചതിനെ തുടര്ന്നാണ് ഭാരതത്തിലെ സംപ്രേഷണം തടഞ്ഞുകൊണ്ട് കേന്ദ്ര വാര്ത്താവിക്ഷേപണമന്ത്രാലയം ഉത്തരവിട്ടിരിക്കുന്നത്.
ഇതിനെ തുടര്ന്ന് ഇന്നലെ മുതല് അഞ്ചുദിവസത്തേയ്ക്ക് സംപ്രേഷണം ഉണ്ടകില്ലെന്ന് ചാനല് അധികൃതല് ഔദ്യോഗികമായി അറിയിച്ചിട്ടുണ്ട്. ഏപ്രില് 22 രാവിലെ 12.01 മുതല് 22ന് 27ന് 12.01 വരെ സംപ്രേഷണം നിര്ത്തിവെച്ചിരിക്കുകയാണെന്നാണ് പ്രേക്ഷകരെ അറിയിച്ചിരിക്കുന്നത്.
അല്ജസീറ പ്രദര്ശിപ്പിച്ചിരുന്ന ഭൂപടത്തില് ജമ്മു കശ്മീരിന്റെ ഒരു ഭാഗം ഭാരതത്തില് ഉള്പ്പെടുത്തിയിരുന്നില്ല. കൂടാതെ ലക്ഷദ്വീപ്, ആന്ഡമാന് തുടങ്ങിയ ദ്വീപുകളേയും ഭാരതത്തിന്റെ ചില ഭൂപടങ്ങളില് ഉള്പ്പെടുത്തുന്നില്ലെന്നും സര്വ്വേയര് ജനറല് ഓഫ് ഇന്ത്യ കണ്ടെത്തിയതിന്റെ അടിസ്ഥാനത്തിലാണ് നടപടി.
ഇത്തരത്തില് പ്രദര്ശിപ്പിച്ചതിന് 2013, 14 വര്ഷങ്ങളിലും ഭാരതത്തിന്റെ തെറ്റായ ഭൂപടം പ്രദര്ശിപ്പിച്ചതിന് കേന്ദ്ര വാര്ത്താ വിക്ഷേപണ മന്ത്രാലയം അല്ജസീറയ്ക്ക് നോട്ടീസ് അയച്ചിരുന്നു.
ദേശീയ ഭൂപട നയത്തിനു വിരുദ്ധമായാണ് അല്ജസീറ ഭാരതത്തിന്റെ ഭൂപടങ്ങള് പ്രദര്ശിപ്പിക്കുന്നതെന്ന് കണ്ടെത്തിയതിന്റെ അടിസ്ഥാനത്തിലാണ് നടപടി സ്വീകരിക്കുന്നതെന്ന് എസ്ജിഐ അറിയിച്ചു.
എന്നാല് അന്താരാഷ്ട്ര തലത്തിലുള്ള സോഫ്ട്വെയറുകളാണ് ഭൂപടം പ്രദര്ശിപ്പിക്കുന്നതിനായി ചാനല് ഉപയോഗിക്കുന്നതെന്നാണ് അല്ജസീറ നോട്ടീസിനു മറുപടിയായി കേന്ദ്രമന്ത്രാലയത്തെ അറിയിച്ചിരിക്കുന്നത്. ഈ വിഷയത്തെ കേന്ദ്രം അതീവ ഗൗരവമായാണ് കാണുന്നത്. നിരന്തരമായി തെറ്റ് ആവര്ത്തിക്കുന്നതിനെ തുടര്ന്നാണ് നടപടിയെന്നും എസ്ജിഐ കൂട്ടിച്ചേര്ത്തു.
