ന്യൂദല്ഹി: ഐപിഎല് എട്ടാം പതിപ്പില് രാജസ്ഥാന് റോയല്സിന് ഇന്ന് രണ്ടാം അങ്കം. ആദ്യ മത്സരത്തില് പഞ്ചാബ് കിംഗ്സ് ഇലവനെ തകര്ത്തതിന്റെ ആത്മവിശ്വാസത്തിലാണ് രാജസ്ഥാന് റോയല്സ് ഇന്ന് രണ്ടാം പോരാട്ടത്തിനിറങ്ങുന്നത്.
ആദ്യ മത്സരത്തില് ചെന്നൈ സൂപ്പര് കിംഗ്സിനോട് പരാജയപ്പെട്ട ദല്ഹി ഡെയര് ഡെവിള്സാണ് ഇന്നത്തെ പോരാട്ടത്തില് റോയല്സിനെ വെല്ലുവിളിക്കാനിറങ്ങുന്നത്. വൈകിട്ട് നാലിന് മത്സരം ആരംഭിക്കും.
കഴിഞ്ഞ ദിവസം ചെന്നൈയില് നടന്ന മത്സരത്തില് വിജയിത്തിനടുത്തെത്തിയശേഷമാണ് ദല്ഹി മത്സരം കൈവിട്ടത്. കേവലം ഒരു റണ്സിനായിരുന്നു ഡെയര് ഡെവിള്സ് ചെന്നൈ സൂപ്പര്കിംഗ്സിനോട് പരാജയപ്പെട്ടത്. എന്നാല് ബാറ്റ്സ്മാന്മാരുടെ ഫോമില്ലായ്മയാണ് ഡെവിള്സിനെ കുഴക്കുന്നത്. മൂന്ന് പേര് മാത്രമാണ് ചെന്നൈക്കെതിരായ കൡയില് രണ്ടക്കം കടന്നത്.
73 റണ്സെടുത്ത് പുറത്താകാതെ നിന്ന ദക്ഷിണാഫ്രിക്കന് ഓള് റൗണ്ടര് ആല്ബി മോര്ക്കലാണ് ഈ കൡയില് മകിച്ച പ്രകടനം നടത്തിയത്. യുവരാജ് സിംഗ്, ക്യാപ്റ്റന് ജെ.പി. ഡുമ്നി, അരങ്ങേറ്റം കുറിച്ച ശ്രേയസ് അയ്യര്, ഓപ്പണര് ഗൗതം തുടങ്ങിയവരെല്ലാം അമ്പേ പരാജയപ്പെട്ടതാണ് ചെകുത്താന്മാര്ക്ക് തിരിച്ചടിയായത്.
ഇന്ന് മുന്നിര ബാറ്റ്സ്മാന്മാര് അവസരത്തിനൊത്തുയര്ന്നില്ലെങ്കില് ഡെയര് ഡെവിള്സിന്റെ കാര്യം കഷ്ടത്തിലാകുമെന്ന് ഉറപ്പ്. ബൗളര്മാര് മികച്ച പ്രകടനമാണ് ആദ്യ മത്സരത്തില് നടത്തിയത്. മൂന്ന് വിക്കറ്റ് വീഴ്ത്തിയ കള്ട്ടര് നീലും ഇമ്രാന് താഹിറും അമിത് മിശ്രയും ഡുമ്നിയും മികച്ച രീതിയില് പന്തെറിഞ്ഞിരുന്നു.
മറുവശത്ത് രാജസ്ഥാന് റോയല്സ് ആദ്യ മത്സരത്തില് 26 റണ്സിന് കിംഗ്സ് ഇലവന് പഞ്ചാബിനെ തകര്ത്തെറിഞ്ഞതിന്റെ ആത്മവിശ്വാസത്തിലാണ്. ഈ ടീമിന്റെയും പ്രധാന പ്രശ്നം ബാറ്റ്സ്മാന്മാരുടെ ഫോമില്ലായ്മയാണ്. അജിന്ക്യ രഹാനെ, സഞ്ജു വി. സാംസണ്, കരുണ് നായര്, സ്റ്റുവര്ട്ട് ബിന്നി തുടങ്ങിയവര് കിംഗ്സ് ഇലവനെതിരായ കൡയില് പരാജയമായിരുന്നു. ഫോക്നറും സ്റ്റീവന് സ്മിത്തും ദീപക് ഹൂഡയുമാണ് ഭേദപ്പെട്ട പ്രകടനം നടത്തിയത്.
ഇവര്ക്കൊപ്പം രഹാനെ ഉള്പ്പെടെയുള്ളവരും മികവുകാണിച്ചാല് ഇന്നും റോയല്സിന്റെ പ്രതീക്ഷ ഏറെ ഉയരും. സൗത്തിയും ക്രിസ് മോറിസും ഫോക്നറും ഉള്പ്പെടുന്ന ബൗളിംഗ് നിരയുടെ കരുത്തിലായിരുന്നു ആദ്യ മത്സരത്തില് റോയല്സ് വെന്നിക്കൊടി പാറിച്ചത്. ഫോക്നര് മൂന്നും സൗത്തി രണ്ടും വിക്കറ്റുകളാണ് ഈ കളിയില് വീഴ്ത്തിയത്. കഴിഞ്ഞ വര്ഷം രണ്ടു തവണയും വിജയം രാജസ്ഥാന് റോയല്സിനൊപ്പമായിരുന്നു. എന്തായാലും ആദ്യ വിജയം ലക്ഷ്യമിട്ട് സ്വന്തം മൈതാനത്ത് ദല്ഹിയും വിജയത്തുടര്ച്ചക്ക് രാജസ്ഥാന് റോയല്സും ഇറങ്ങുമ്പോള് ആവേശപ്പോരാട്ടത്തിനായിരിക്കും ദല്ഹിയിലെ ഫിറോസ് ഷാ കോട്ല സ്റ്റേഡിയം സാക്ഷ്യം വഹിക്കുക.
