420. പാശാങ്കശേക്ഷു കോദണ്ഡപഞ്ചബാണലമ്പത്കരാ: – പാശം, അങ്കുശം, ഇക്ഷുകോരദണ്ഡം, പഞ്ചബാണങ്ങള് എന്നീ ആയുധങ്ങള് ശോഭിക്കുന്ന കൈകളുള്ളവള്. ദേവിയുടെ ഈ ആയുധങ്ങളെ ലളിതാസഹസ്രനാമത്തില് വാഗ്ദേവതകള് അവതരിപ്പിക്കുന്നത് ”രാഗസ്വരൂപപാശാഢ്യാ, ക്രോധാകാരാംങ്കുശോജ്ജ്വലാ, മനോരൂപേക്ഷുകോദണ്ഡാ, പഞ്ചതന്മാത്രസായകാ” എന്നാണ്.
ഇതനുസരിച്ച് ദേവിയുടെ കൈയിലുള്ള പാശം എന്ന ദിവ്യായുധം രാഗസ്വരൂപമാണ് മനുഷ്യരെയും ജീവികളെയും പരസ്പരം ബന്ധിക്കുന്ന രാഗം വാത്സല്യമായും പ്രേമമായും താത്പര്യമായും മമതയായും വ്യക്തികളെയും ജീവികളെയും പരസ്പരം ബന്ധിക്കുന്നു. മറ്റൊരായുധം അങ്കശമാണ്. അത് ക്രോധത്തിന്റെ പ്രതീകമാണ്. രാഗം ജീവികളെ സ്നേഹംകൊണ്ടു ബന്ധിക്കുമ്പോള് ക്രോധം അകറ്റുകയും വെറുപ്പിക്കുകയും ഹിംസയ്ക്കു പ്രേരിപ്പിക്കുകയും ചെയ്യുന്നു. സങ്കല്പവും വികല്പവുംകൊണ്ട് വളരുകയും നിവരുകയും ചെയ്യുന്ന മനസ്സാണ് ദേവിയുടെ മറ്റൊരായുധമായ ഇക്ഷുകോദണ്ഡം. കരിമ്പാണ് ദേവിയുടെ വില്ല.
വളഞ്ഞാലും നിവര്ന്നാലും ഉള്ളില് മധുരമാണ്. ഏറ്റവും വിപരീതമായ സാഹചര്യത്തില്പോലും മധുരത്തിന്റെ കിനിവ് ഉണ്ടായിരിക്കും. ആ വില്ലില്നിന്നു പറുത്തേക്കു പാഞ്ഞുപോകുന്ന അമ്പുകള് ശബ്ദം, സ്പര്ശം, രസം, രൂപം, ഗന്ധം എന്നീ പഞ്ചതന്മാത്രകളാണ്. മൂകാംബികാദേവി കരുണാതരംഗിതമായ വാത്സത്യത്തോടെ പ്രാപഞ്ചപ്രവര്ത്തനം നിയന്ത്രിക്കുന്നത് നാലു തൃക്കൈകളിലുമുള്ള ആ ആയുധങ്ങള്കൊണ്ടാണ്. ഈ ആയുധങ്ങള് അധ്യഷ്യങ്ങളാണ്.
421. ബ്രഹ്മവിഷ്ണുശിവാരാധ്യാ: – ബ്രഹ്മാവ്, വിഷ്ണു, ശിവന് എന്നീ ദേവനാഥന്മാരാല് ആരാധിക്കപ്പെടുന്നവള്. സൃഷ്ടിക്കും പാലനത്തിനും സംഹാരത്തിനും വേണ്ട അറിവും കഴിവും ലഭിക്കുന്നതിനായി ബ്രഹ്മാവും വിഷ്ണുവും ശിവനും ദേവിയെ ആരാധിക്കുന്നു.
422. ഗന്ധര്വാപ്സരപൂജിതാ: – ഗന്ധര്വന്മാരാലും അപ്സരസ്സുകളാലും പൂജിക്കപ്പെടുന്നവള്. ത്രിമൂര്ത്തികളാല് ആരാധിക്കപ്പെടുന്നവള് എന്നു പറഞ്ഞുകഴിഞ്ഞ് ഗന്ധര്വന്മാരാലും അപ്സരസ്സുകളാലും പൂജിക്കപ്പെടുന്നവളായി പറയുമ്പോള് എല്ലാ ദേവന്മാരാലും ആരാധിക്കപ്പെടുന്നവള് എന്നു മനസ്സിലാക്കാം.
…. തുടരും
