ഒരു അത്യത്ഭുത പ്രതിഭയുടെ ഉടമയായിരുന്ന വിശ്രുത ശാസ്ത്രജ്ഞനാണ് തോമസ് ആല്വാ എഡിസണ്. സ്വനഗ്രാഹി യന്ത്രം, ഇലക്ട്രോണിക് ലൈറ്റ്, വൈദ്യുത ട്രാം വണ്ടി മുതലായ ആധുനിക കണ്ടുപിടിത്തങ്ങള് പലതിന്റെയും ഉപജ്ഞാതാവാണദ്ദേഹം. ആദ്യത്തെ വൈദ്യുത പവര് സ്റ്റേഷന് ഉണ്ടാക്കിയതും അദ്ദേഹംതന്നെ.
ശാസ്ത്ര വിഷയങ്ങളെപ്പറ്റി സ്കൂളിലോ കോളേജിലോ പഠിക്കാതെ തന്നെ മഹത്തായ പല കണ്ടുപിടിത്തങ്ങളും ആ പ്രതിഭാശാലി നിര്വഹിച്ചു. തീവണ്ടിയില് പത്രവില്പ്പനക്കാരനായി ജീവിതമാരംഭിച്ച് പന്ത്രണ്ടാം വയസ്സില് ഉപജീവനമാര്ഗം തേടിയ എഡിസന് ഇതൊക്കെ എങ്ങനെ സാധിച്ചുവെന്ന് പലരും അത്ഭുതപരതന്ത്രരായി ചിന്തിച്ചിട്ടുണ്ട്. ജന്മസിദ്ധമായ പ്രതിഭക്കും പരിശ്രമശീലത്തിനും പുറമെ ലഹരിപദാര്ത്ഥങ്ങള് ഉപയോഗിക്കാത്ത ഒരു സാത്വികജീവിതം അദ്ദേഹത്തെ അതിനു കഴിവുള്ളവനാക്കി എന്ന് പലരും കരുതുന്നു.
ഒരിക്കല് മാന്യനായ ഒരു സുഹൃത്ത് അദ്ദേഹത്തെ ഒരു വിരുന്നിന് ക്ഷണിച്ചു. അതില് പങ്കുകൊണ്ടു. സല്ക്കാരം പൊടിപൊടിച്ചു. അവര് മദ്യക്കുപ്പികള് പുറത്തെടുത്ത് മദ്യം ഗ്ലാസുകളില് പകര്ന്നു.
”എഡിസണ്, ഇതു കുടിക്കൂ.’ സുഹൃത്തുക്കള് നിര്ബന്ധിച്ചു.
‘ഇല്ല. ഞാന് മദ്യം കഴിക്കാറില്ല.’എഡിസണ് ഒഴിഞ്ഞുമാറി.
അതു സാരമില്ല. തലച്ചോറിന് ഉണര്വു നല്കാന് ഇത് ഉത്തമമാണ്. നിങ്ങളുടെ പ്രതിഭ വളരുന്നതിനും ഇതുപകരിക്കും.’ കൂട്ടുകാര് പറഞ്ഞു.
‘എന്റെ അഭിപ്രായം അതിനു നേരെ വിപരീതമാണ്. എഡിസണ് പറഞ്ഞു. ഏതായാലും കുറച്ചു കുടിക്കുന്നതുകൊണ്ട് ദോഷമില്ല.’ അവര് മദ്യം നിറച്ച ഗ്ലാസ് എഡിസന്റെ കൈയില് കൊടുത്തു. നല്ല നടനും നല്ല ഗായകനും മികച്ച സാഹിത്യകാരനും കഴിവുറ്റ ശാസ്ത്രജ്ഞനും ശോഭിക്കുന്നത് മദ്യത്താലാണ്.’ അവര് പറഞ്ഞു.
എഡിസണ് ഉറച്ചസ്വരത്തില് പറഞ്ഞു. ”ജനങ്ങളുടെ മനസ്സിലുള്ള മിഥ്യാധാരണ കഷ്ടം തന്നെ. തലച്ചോറിനെയും ഞരമ്പുകളെയും അവസാനം തളര്ത്താന് മാത്രമേ മദ്യം ഉപകരിക്കുകയുള്ളൂ. സമൂഹത്തിലെ വലിയൊരു ന്യൂനത മദ്യഭ്രാന്താണ്.”
എഡിസണ് തുടര്ന്ന് ശക്തിയായ ഭാഷയില് പറഞ്ഞു. തെറ്റു ചെയ്യില്ലെന്ന് ഞാന് പ്രതിജ്ഞ ചെയ്തിട്ടുണ്ട്. എന്റെ തലച്ചോറ് എനിക്ക് നല്ല കാര്യങ്ങള്ക്കായി വിനിയോഗിക്കണം. ആര്ക്കായാലും മദ്യം കഴിവുകള് നശിപ്പിക്കാനേ പ്രയോജനപ്പെടു എന്നെനിക്കു ബോധ്യമുണ്ട്.
