മാഡ്രിഡ്: സ്പാനിഷ് ലീഗ് ഫുട്ബോളില് സ്വന്തം തട്ടകത്തില് റയല് മാഡ്രിഡിന് സമനില. വിയ്യാറയലാണ് ഇന്നലെ നടന്ന കളിയില് കരുത്തരായ റയലിനെ 1-1ന് സമനിലയില് തളച്ചത്. സമനിലയില് കുടുങ്ങിയെങ്കിലും പോയിന്റ് പട്ടികയില് ഒന്നാം സ്ഥാനത്ത് റയല് തന്നെയാണ്.
25 കളികളില് നിന്ന് 61 പോയിന്റാണ് അവര്ക്കുള്ളത്. അത്രയും കളികളില് നിന്ന് 59 പോയിന്റുള്ള ബാഴ്സലോണ രണ്ടാം സ്ഥാനത്തും 54 പോയിന്റുള്ള അത്ലറ്റികോ മാഡ്രിഡ് മൂന്നാം സ്ഥാനത്തും തുടരുന്നു. റയലിനായി 52-ാം മിനിറ്റില് പെനാല്റ്റിയിലൂടെ ക്രിസ്റ്റിയാനോ റൊണാള്ഡോയും 64-ാം മിനിറ്റില് മൊറേനോ ബലാഗ്യൂറോ വിയ്യാറയലിനുവേണ്ടിയും ഗോള് നേടി.
സാന്റിയാഗോ ബെര്ണാബ്യൂവില് നടന്ന പോരാട്ടത്തില് ആധിപത്യം റയലിനുതന്നെയായിരുന്നു. കളിയുടെ 62 ശതമാനവും പന്ത് നിയന്ത്രിച്ചുനിര്ത്തിയ റയല് കളിയിലുടനീളം 25 ഷോട്ടുകളാണ് പായിച്ചത്. അതില് ഏഴെണ്ണം ലക്ഷ്യത്തിലേക്ക് നീങ്ങിയെങ്കിലും വിയ്യാറയല് ഗോളിയെ കീഴടക്കാന് കഴിഞ്ഞില്ല.
റയലിന് വേണ്ടി ക്രിസ്റ്റിയാനോ, ഗരെത്ത് ബെയ്ല്, കരിം ബെന്സേമ, ടോണി ക്രൂസ്, യുവ താരം ഇസ്കോ തുടങ്ങിയവര് അണിനിരന്നിട്ടും ആദ്യപകുതിയില് ഗോള് നേടാന് കഴിഞ്ഞില്ല. ക്രിസ്റ്റിയാനോയും കരിം ബെന്സേമയുമായിരുന്നു അവസരങ്ങള് പാഴാക്കുന്നതില് മുന്നിട്ടുനിന്നത്. ഇടയ്ക്ക് വിയ്യാറയലും ചില മികച്ച മുന്നേറ്റങ്ങള് നടത്തിയെങ്കിലും റയല് ഗോളിയെ കീഴടക്കാന് കഴിയായതിരുന്നതോടെ ആദ്യപകുതി ഗോള്രഹിത സമനിലയില് കലാശിച്ചു.
രണ്ടാം പകുതിയുടെ തുടക്കത്തില് തന്നെ ക്രിസ്റ്റിയാനോയുടെ തകര്പ്പന് ഷോട്ട് വിയ്യാറയല് ഗോളി രക്ഷപ്പെടുത്തി. എന്നാല് അധികം കഴിയും മുന്നേ റയല് ലീഡ് നേടുകയും ചെയ്തു. ക്രിസ്റ്റിയാനോയെ ബോക്സിനുള്ളില് വച്ച് വിയ്യാറയലിന്റെ എറിക് ബെയ്ലി വീഴ്ത്തിയതിന് ലഭിച്ച പെനാല്റ്റിയിലൂടെയാണ് റയല് ലീഡ് നേടിയത്. കിക്കെടുത്ത ക്രിസ്റ്റിയാനോ വിയ്യാറയല് ഗോളിയെ കബളിപ്പിച്ച് പന്ത് വലയിലെത്തിച്ചു. തൊട്ടുപിന്നാലെ ക്രിസ്റ്റിയാനോയുടെയും ബെയ്ലിന്റെയും ശ്രമങ്ങള് പാഴായി. എന്നാല് 64-ാം മിനിറ്റില് ജെറാര്ഡോ മൊറേനോയിലൂടെ വിയ്യാറയല് സമനില പിടിച്ചു. പിന്നീട് വിജയത്തിനായി റയല് താരങ്ങള് ആഞ്ഞുപൊരുതിയെങ്കിലും വിയ്യാപ്രതിരോധവും ഗോളിയും തകര്പ്പന് പ്രകടനവുമായി പൊരുതിനിന്നതോടെ വിജയഗോളെന്ന സ്വപ്നം പാഴായി.
മറ്റൊരു മത്സരത്തില് അത്ലറ്റികോ മാഡ്രിഡിനെ സെവിയ ഗോള്രഹിത സമനിലയില് തളച്ചു. മറ്റ് മത്സരങ്ങളില് വലന്സിയ 2-0ന് റയല് സോസിഡാഡിനെയും അത്ലറ്റിക് ബില്ബാവോ 1-0ന് ഐബറിനെയും പരാജയപ്പെടുത്തി.
