236. മഹാകോപാഃ – മഹത്തായ കോപമുള്ളവള്. കോപം ലോകത്തിന്റെ നന്മയ്ക്കായി അധര്മ്മത്തിനും അധര്മ്മികള്ക്കും എതിരായി പ്രവര്ത്തിക്കുമ്പോള് ‘മഹാ’ എന്ന വിശേഷണം അര്ഹിക്കുന്നതാകും. ജഗത്തിന്റെ അമ്മയാണു മൂകാംബിക. ദേവിക്കു സന്താനങ്ങളുടെ നേര്ക്കു കോപമില്ല. വാത്സല്യമേ ഉള്ളൂ. ധര്മ്മസംസ്ഥാപനത്തിനുവേണ്ടി ചിലപ്പോള് ദേവി കോപം അഭിനയിക്കും. തന്റെ സന്താനങ്ങളുടെ നന്മയ്ക്കായിദേവി കോപം അഭിനയിക്കുമ്പോള് ദേവി ”മഹാ കോപാ’ എന്ന നാമം അര്ഹിക്കുന്നു.
237. മഹാവേഗാഃ – മഹത്തായ വേഗമുള്ളവള്. പ്രവര്ത്തനത്തിന്റെ ശീഘ്രതയാണു വേഗം. സങ്കല്പം മാത്രംകൊണ്ട് ലോകങ്ങളുടെ സൃഷ്ടി സ്ഥിതി സംഹാരങ്ങള് നടത്തുന്നവള്.
വേഗത്തിന് ആനന്ദം എന്നും അര്ത്ഥമുണ്ട്. വിഷയബന്ധമില്ലാത്ത ആനന്ദം മഹാവേഗം. അതു രൂപമായവള് മഹാവേഗയായ ദേവി.
മഹാ- ആവേഗാ എന്നും നാമത്തെ പിരിക്കാം. ആവേഗത്തിന് തിടുക്കം, കോപം എന്നീ അര്ത്ഥങ്ങളുണ്ട്. കോലം എന്ന അര്ത്ഥം സ്വീകരിച്ചാല് ‘മഹാകോപാ’ എന്ന നാമത്തിന്റെ പര്യായമാകും. തിടുക്കം എന്ന അര്ത്ഥം സ്വീകരിച്ചാല് മഹാവേഗാ എന്നുതന്നെ അര്ത്ഥം.
238. മഹൈശ്വര്യ പ്രദായിനിഃ – മഹത്തായ ഐശ്വര്യം പ്രദാനം ചെയ്യുന്നവള്. അണിമ തുടങ്ങിയ ഐശ്വര്യങ്ങളുടെ സമഗ്രതയെ മഹൈശ്വര്യം എന്നുപറയാം. എല്ലാ മഹത്തായ ഐശ്വര്യങ്ങളും ഭക്തര്ക്കു കൊടുത്തനുഗ്രഹിക്കുന്നവള്.
239. മഹാവീരാഃ – മഹത്തായ വീര്യമുള്ളവള്. വീര്യത്തിന് ശക്തി, പുഷ്ടി, ഉറപ്പ്, ഗന്ധം, രസം, രൂപം, സാമര്ത്ഥ്യം, ശരീരം, രക്തം, ശുക്ലം, മുള, സൈന്യം തുടങ്ങി വിവിധാര്ത്ഥങ്ങള്. ഇവയില് ഏതിനോട് ‘ശ്രേഷ്ഠം’ എന്നര്ത്ഥമുള്ള ‘മഹാ’ എന്ന വിശേഷണം ചേര്ത്താലും അതു ദേവീപര്യായമാകും. സര്വശ്രേഷ്ഠത ദേവിക്കേയുള്ളൂ.
…. തുടരും
