കരുനാഗപ്പള്ളി: വേലുക്കുട്ടി അരയന്റെ സ്മരണകളില് നിന്ന് വൈക്കം സത്യഗ്രഹ ഭൂമിയിലേക്ക് ജ്യോതിപ്രയാണം. ചരിത്രംകുറിച്ച വൈക്കം സത്യഗ്രഹത്തിന്റെ നവതി ആഘോഷച്ചടങ്ങിലേക്കുള്ള ജ്യോതിപ്രയാണത്തിന് ചെറിയഴീക്കലിലെ വേലുക്കുട്ടി അരയന്റെ സ്മൃതി മണ്ഡപത്തില് നിന്ന് തുടക്കമായി. മാതാ അമൃതാനന്ദമയി മഠത്തിലെ സ്വാമി തുരിയാമൃതാനന്ദപുരി ഉദ്ഘാടനം നിര്വഹിച്ചു.
വേലുക്കുട്ടി അരയന് ബഹുമുഖപ്രതിഭ ആയിരുന്നുവെന്ന് അനുസ്മരണപ്രഭാഷണം നടത്തിയ ധീവരസഭ സംസ്ഥാനപ്രസിഡന്റ് കെ.കെ.രാധാകൃഷ്ണന് പറഞ്ഞു. സമാജത്തിലെ അവശത അനുഭവിക്കുന്ന ജനതയുടെ അവകാശങ്ങള് നേടിയെടുക്കുവാന് നടന്ന പ്രക്ഷോഭങ്ങളിലെ മുഖ്യസംഘാടകനായിരുന്നു വേലുക്കുട്ടി അരയന്. സവര്ണ അവര്ണ വ്യത്യാസമില്ലാതെ ഹിന്ദുഐക്യത്തിനുവേണ്ടി പ്രവര്ത്തിച്ച ടി.കെ.മാധവന്, സി.കേശവന്, മന്നത്ത് പത്മനാഭന് തുടങ്ങിയവരുടെ പ്രവര്ത്തനങ്ങള്ക്ക് പിന്തുണ നല്കുക മാത്രമല്ല, കയര് മത്സ്യത്തൊഴിലാളികള് ഉള്പ്പെടെ അവശത അനുഭവിക്കുന്ന മുഴുവന് ജനങ്ങള്ക്കും വേണ്ടി പ്രവര്ത്തിച്ച വ്യക്തിത്വമായിരുന്നു അദ്ദേഹമെന്ന് രാധാകൃഷ്ണന് ചൂണ്ടിക്കാട്ടി.
1924ലെ വാര്ഷികസമ്മേളനത്തില് മന്നത്തിന്റെയും മറ്റ് അവര്ണഹിന്ദുസമൂഹത്തിന്റെ എല്ലാ പിന്തുണയോടെ അവര്ണ ഹിന്ദുമഹാസഭയുടെ ജനറല്സെക്രട്ടറിയായി തെരഞ്ഞെടുക്കപ്പെട്ടു. അവര്ണര്ക്കുവേണ്ടി പ്രവര്ത്തിച്ചതിന് ജില്ലാ മജിസ്ട്രേറ്റ് പൊതുയോഗങ്ങളില് പങ്കെടുക്കുന്നതിന് വിലക്കേര്പ്പെടുത്തി. 1916ല് അരയസമാജത്തിന്റെ ഉന്നമനത്തിനായി പ്രവര്ത്തനമാരംഭിച്ച അരയവംശ പരിപാലനയോഗത്തിന്റെ നൂറാം വാര്ഷികം കൂടിയാണ് ഈ വര്ഷം.
എന്നാല് അദ്ദേഹത്തിന്റെ പ്രവര്ത്തനങ്ങള്ക്ക് പൊതുസമൂഹത്തില് നിന്നും വേണ്ട അംഗീകാരം ലഭിച്ചിട്ടുണ്ടോയെന്നത് സംശമാണെന്നും അദ്ദേഹം ചൂണ്ടിക്കാട്ടി. ധീവരസഭ ജില്ലാപ്രസിഡന്റ് എസ്.കൃഷ്ണന് വേലുക്കുട്ടി അരയന് ഫൗണ്ടേഷന് ഡയറക്ടര് അഡ്വ.അനില്, വി.നാഗാനന്ദന്, ഡയറക്ടര്മാരായ വിഷ്ണു, ശശിധരന്, ദിനേശ്ബാബു, ഹിന്ദുഐക്യവേദി നേതാക്കളായ പുത്തൂര് തുളസി, അഡ്വ.സുധീര്, ഓച്ചിറ രവികുമാര്, വിജയകുമാര്, വയലിത്തറ കാര്ത്തികേയന്, മുത്തുകൃഷ്ണന് തുടങ്ങിയവര് പങ്കെടുത്തു.
നവോത്ഥാന നായകനും തീരദേശജനതയുടെ സമുദ്ധാരകനും ഹിന്ദുഐക്യത്തിന്റെ സമരനായകനുമായിരുന്ന ഡോ.വി.വി.വേലുക്കുട്ടി അരയന്റെ സന്ദേശം വരുംതലമുറകള്ക്ക് പകര്ന്ന് നല്കുവാന് പര്യാപ്തമായ സ്മാരകം നിര്മ്മിക്കുവാന് സര്ക്കാര് തയ്യാറാകണമെന്ന് ഡോ.വി.വി.വേലുക്കുട്ടി അരയന് ഫൗണ്ടേഷന് ഭാരവാഹികള് സമ്മേളനത്തില് ആവശ്യപ്പെട്ടു.
ജാതിമത ചിന്തകള്ക്കതീതമായ സമാജത്തിന്റെ ഉന്നമനത്തിനായി പ്രവര്ത്തിച്ച പല പ്രമുഖരുടെയും സ്മാരകങ്ങള് സംരക്ഷിക്കുവാനോ പുതുതലമുറക്ക് അവരുടെ സന്ദേശം പകര്ന്നുനല്കി അവരെ നേര്വഴിക്ക് നയിക്കുവാനോ മാറിമാറി വരുന്ന സര്ക്കാരുകള് വേണ്ട ശ്രദ്ധ നല്കുന്നില്ലായെന്നും അതിന്റെ പോരായ്മകളാണ് സമൂഹത്തില് ഇന്ന് കാണുന്ന ദുരവസ്ഥയ്ക്ക് കാരണമെന്നും ഭാരവാഹികള് പറഞ്ഞു.
ജീര്ണാവസ്ഥയിലായ അദ്ദേഹത്തിന്റെ ജന്മഗൃഹം പുതുക്കി പണിതുനല്കാമെന്ന് മുന്സാംസ്കാരികമന്ത്രി എം.എ.ബേബി ഉറപ്പു നല്കിയിരുന്നതായി മകന്റെ ഭാര്യ സുധര്മ്മ പറഞ്ഞു. ഫൗണ്ടേഷന് ഡയറക്ടര് അഡ്വ.അനില്.വി.നാഗാനന്ദന്, ഡയറക്ടര്മാരായ ശശിധരന്, ദിനേഷ് ബാബു, വിഷ്ണു എന്നിവര് പങ്കെടുത്തു.
