മരട്: വൈറ്റില-അരൂര്‍ ബൈപ്പാസില്‍ നെട്ടൂര്‍ ഐഎന്‍ടിയുസി ജംഗ്ഷനില്‍ നിന്ന് ബുധനാഴ്ച രാത്രി മൂന്ന് യുവാക്കളെ മര്‍ദ്ദിച്ചവശരാക്കിയശേഷം ടാക്‌സി കാറില്‍ കയറ്റിക്കൊണ്ടുപോയതിനു പിന്നില്‍ ഞാറക്കല്‍ പോലീസ്.
ബുധനാഴ്ച രാത്രി മുതല്‍ വടുതല സ്വദേശിയായ യുവാവിനെ കാണാതിരുന്നതിനാല്‍ അച്ഛനും അമ്മയും അന്വേഷിച്ചുവരികയായിരുന്നു. ഇതിനിടെ നെട്ടൂരില്‍ നിന്ന് മൂന്ന് യുവാക്കളെ അജ്ഞാത സംഘം കാറില്‍ കയറ്റിക്കൊണ്ടുപോയതായി ജന്മഭൂമി റിപ്പോര്‍ട്ട് ചെയ്തവാര്‍ത്ത കണ്ടതിനെ തുടര്‍ന്ന് സിറ്റി പോലീസ് കമ്മീഷണര്‍ക്കു പരാതി നല്‍കിയിരുന്നു.
ശനിയാഴ്ച പനങ്ങാട് സ്റ്റേഷനിലെത്തിയ മാതാപിതാക്കളോട് മകന്‍ ഞാറക്കല്‍ സ്റ്റേഷനില്‍ കസ്റ്റഡിയിലുണ്ടെന്ന് അറിയിക്കുകയായിരുന്നു. ഞാറക്കല്‍ സ്റ്റേഷനിലെത്തിയ മാതാപിതാക്കളോട് വ്യക്തമായി കാര്യങ്ങള്‍ പറയുവാനോ മകനെ കാണണമെന്ന ആവശ്യവും നിഷേധിച്ചു. തുടര്‍ന്ന് ഏറെനേരം സ്റ്റേഷനില്‍ കാത്തിരുന്ന ഇവര്‍ക്ക് വൈകുന്നേരമാണ് മകനെ കാണാനായത്.
കഞ്ചാവു കേസില്‍ പിടിക്കപ്പെട്ടവര്‍ക്കൊപ്പമാണ് ഇയാളെയും അറസ്റ്റ് ചെയ്തത്.
ബുധനാഴ്ച കസ്റ്റഡിയിലെടുത്ത വടുതല സ്വദേശിയായ യുവാവിനെ നാല് ദിവസം കസ്റ്റഡിയില്‍ വെച്ച് പീഡിപ്പിച്ചത് എന്തിനെന്നു വിശദീകരിക്കാന്‍ കഴിയാത്ത അവസ്ഥയിലാണ് ഞാറക്കല്‍ എസ്‌ഐ.
മാധ്യമങ്ങളില്‍ വാര്‍ത്ത വന്ന് സംഭവം വിവാദമായതോടെയാണ് യുവാവിനെ വിട്ടയക്കാന്‍ പോലീസ് തയ്യാറായത്. തങ്ങളുടെ മകനെ നാല് ദിവസം കസ്റ്റഡിയില്‍ വച്ചു പീഡിപ്പിച്ച സംഭവത്തില്‍ പോലീസിനെതിരെ മനുഷ്യാവകാശ കമ്മീഷന് പരാതി നല്‍കാന്‍ ഒരുങ്ങുകയാണ് യുവാവിന്റെ മാതാപിതാക്കള്‍.
