കൊട്ടാരക്കര: രണ്ട് ഗ്രാമപഞ്ചായത്തുകളുടെ പ്രതീക്ഷയായിരുന്ന കുളക്കട പവിത്രേശ്വരം കുടിവെളളപദ്ധതി ലക്ഷ്യമില്ലാതെ നീളുന്നു. ഈ വേനലിലെങ്കിലും കുടിവെള്ളം കിട്ടുമെന്ന നാട്ടുകാരുടെ കാത്തിരിപ്പ് മഴ കാത്ത് കഴിയുന്ന വേഴാമ്പലിനെ പോലെ നീളുകയാണ്. 2014 നവംബറില് കമ്മീഷന് ചെയ്യുമെന്ന് പ്രഖ്യാപിച്ചിരുന്ന പദ്ധതിയാണ് അന്തമില്ലാതെ നീണ്ടുപോകുന്നത്.
പദ്ധതിക്കായി കുളക്കടയിലെ തെങ്ങമാംപുഴ കടവില് കിണര് നിര്മ്മിച്ച് പെരുംകുളത്ത് ട്രീറ്റ്മെന്റ് പ്ലാന്റ് സ്ഥാപിച്ച് ഇവിടെ വെള്ളം എത്തിക്കുവാനും ശുദ്ധീകരണത്തിന് ശേഷം കുളക്കട, പവിത്രേശ്വരം പഞ്ചായത്തിലേക്കുമുളള രണ്ട് മെയിന് പൈപ്പ്ലൈന് സ്ഥാപിച്ച് വെള്ളമെത്തിക്കുവാനുമായിരുന്നു പ്ലാന്. പവിത്രേശ്വരം പഞ്ചായത്തിലേക്കാവശ്യമായ ജലം പൊരീക്കലിലെ വാട്ടര്ടാങ്കില് സംഭരിച്ച ശേഷമാണ് വിതരണം ചെയ്യുക.
കുളക്കട ഗ്രാമപഞ്ചായത്തില് എല്ലായിടത്തും കുടിവെള്ളമെത്തിക്കാന് കഴിയുമെന്നായിരുന്നു അവകാശവാദമെങ്കിലും ട്രയല് റണ് തുടങ്ങിയപ്പോള് കുളക്കടയിലെ 18 പൊതുടാപ്പുകളില് മാത്രമാണ് വെള്ളം എത്തിയത്. എല്ലാ വീടുകള്ക്കും വെള്ളമെത്തിയ്ക്കുമെന്ന് പറഞ്ഞ് തുടങ്ങിയ പദ്ധതിയാണ് 18 ടാപ്പുകളില് ഒതുങ്ങുന്നത്.
പവിത്രേശ്വരം പഞ്ചായത്തിലും സ്ഥിതി മറിച്ചല്ല. ഇവിടെ മുമ്പ് ഉണ്ടായിരുന്ന ചില ടാപ്പുകളില് മാത്രം ട്രയല് റണ് സമയത്ത് വെള്ളമെത്തി. പുതുതായി ടാപ്പുകള് സ്ഥാപിച്ചിട്ടില്ല. കേന്ദ്രസര്ക്കാര് ത്വരിതഗ്രാമീണ ശുദ്ധജലവിതരണ പദ്ധതിയിലുള്പ്പെടുത്തി 2009ല് 13 കോടി രൂപയാണ് കുളക്കട പവിത്രേശ്വരം പഞ്ചായത്തുകള്ക്കായി കുടിവെള്ള പദ്ധതിക്ക് അനുവദിച്ചത്.
രണ്ട് പഞ്ചായത്തിലുമായി 19000 വീടുകള്ക്ക് പ്രയോജനപ്പെടുമെന്നാണ് കണക്കു കൂട്ടിയത്.
2011ല് കുടിവെള്ളപദ്ധതി കമ്മീഷന് ചെയ്യുമെന്നാണ് പ്രഖ്യാപിച്ചിരുന്നതെങ്കിലും നിര്മ്മാണം പൂര്ത്തിയായില്ലെന്ന കാരണത്താല് പിന്നീടിത് 2012ല് കമ്മീഷന് ചെയ്യാമെന്ന് രേഖാമൂലം പഞ്ചായത്തുകള്ക്ക് ഉറപ്പ് നല്കി. പിന്നീട് 2013, 2014ലും ഇതേ പ്രഖ്യാപനം ഉണ്ടായെങ്കിലും പദ്ധതി ഇപ്പോഴും നീളുകയാണ്. ഈ വേനലിലും കുടിവെള്ളത്തിനായി നെട്ടോട്ടമോടുന്ന അവസ്ഥയിലാണ് ഇവിടുത്തുകാര്.
