പത്തനാപുരം: അകാലത്തില് പൊലിഞ്ഞ വിജയബാബു (47)വിന് ജന്മനാടും സഹപ്രവര്ത്തകരും കണ്ണീരോടെ വിട നല്കി.
പത്തനാപുരം പോലീസ് സ്റ്റേഷനിലെ സിപിഒ ആയിരുന്ന വിജയബാബു ഡ്യൂട്ടി കഴിഞ്ഞ് മഞ്ചള്ളൂര് ആദംക്കോട്ടുള്ള വീട്ടിലേക്ക് പോകവെ സഞ്ചരിച്ചിരുന്ന ഇരുചക്രവാഹനം മറിഞ്ഞ് തലക്ക് സാരമായി പരിക്കേല്ക്കുകയും തുടര്ന്ന് തിരുവനന്തപുരം അനന്തപുരിയില് ചികിത്സയിലിരിക്കെ ചൊവാഴ്ച രാത്രി എട്ടുമണിയോടെ മരണം സംഭവിക്കുകയുമായിരുന്നു.
പോസ്റ്റുമോര്ട്ടത്തിനുശേഷം മൃതശരീരം കൊട്ടാരക്കര റൂറല് പോലീസ് ആസ്ഥാനത്തും കുന്നിക്കോട് പോലീസ് സ്റ്റേഷനിലും തുടര്ന്ന് അദ്ദേഹം സേവനമനുഷ്ഠിച്ചുവന്ന പത്തനാപുരം പോലീസ് സ്റ്റേഷനിലും പൊതുദര്ശനത്തിന് വച്ചു.
സഹപ്രവര്ത്തകരുടെ അന്ത്യമോപചാരത്തിന് ശേഷം മൃതശരീരം വിലാപയാത്രയായി മഞ്ചള്ളൂര് ആദംക്കോട്ടുള്ള വസതിയില് എത്തിച്ചു.
സിവില് പോലീസ് ഓഫീസറിനു പുറമെ ജനമൈത്രി ബിറ്റ് ഓഫീസറായും പോലീസ് അസോസിയേഷന് പത്തനാപുരം മേഖലാ കൗണ്സിലറായും പ്രവര്ത്തിച്ചുവന്ന വിജയബാബു ഏവരുടെയും പ്രിയപ്പെട്ടവനായിരുന്നു. കുടുംബാംഗങ്ങളുടെ അന്ത്യകര്മ്മങ്ങള്ക്കുശേഷം നാലുമണിയോടെ ഔദ്യോഗിക ബഹുമതികളോടെ വീട്ടുവളപ്പില് സംസ്കരിച്ചു.
