ഇന്നലെ നടന്ന മിസോറാം-ബംഗാള് മത്സരത്തില് നിന്ന്. ചിത്രം: എം.ആര്. ദിനേശ്കുമാര്
കോഴിക്കോട്: ദേശീയ ഗെയിംസ് ഫുട്ബോള് മൂന്നാമത്തെ മത്സരത്തില് ഏകപക്ഷീയമായ രണ്ടു ഗോളുകള്ക്ക് മിസോറാം പശ്ചിമബംഗാളിനെ അട്ടിമറിച്ചു. ഇന്നലെ വൈകീട്ട് നാലിന് കോഴിക്കോട് കോര്പ്പറേഷന് സ്റ്റേഡിയത്തില് നടന്ന ആദ്യ മത്സരത്തിലാണ് കരുത്തരായ പശ്ചിമബംഗാളിന് മിസോറാമിനോട് അടിയറവു പറയേണ്ടിവന്നത്. മിസോറാമിന് വേണ്ടി ഡേവിഡ് ലാല്റിന് മുവാനയും ലാല്ദാംപുയയും ഗോളുകള് നേടി.
കളിയുടെ ആദ്യ മിനിറ്റുകളില് പശ്ചിമബംഗാള് മുന്നേറ്റം നടത്തിയെങ്കിലും തുടര്ന്നങ്ങോട്ട് മിസോറാമിന്റെ ആധിപത്യമായിരുന്നു. കളിയുടെ ആദ്യപകുതിയിലും രണ്ടാം പകുതിയിലും വ്യക്തമായ ആധിപത്യമാണ് മിസോറാമിന് നേടിയത്. മിസോറാം താരങ്ങളുടെ മുന്നേറ്റത്തെ തടയാന് പശ്ചിമബംഗാള് താരങ്ങള് നടത്തിയ ശ്രമങ്ങള് പരാജയപ്പെടുന്ന കാഴ്ചയാണ് കാണാനായത്.
പതിനാലാം മിനിറ്റില് മിസോറാമിന് വേണ്ടി ക്യാപ്റ്റന് ഡേവിഡ് ലാല്റിന് മുവാനയാണ് ആദ്യഗോള് നേടിയത്. ഡേവിഡിന്റെ മുന്നേറ്റം തടയാനായി മുന്നോട്ടുവന്ന പശ്ചിമബംഗാള് ഗോള് കീപ്പര് രജു ഗാംഗുലിയെ കബളിപ്പിച്ചാണ് പന്ത് വലയിലാക്കിയത്. തുടര്ന്ന് നിരവധി തവണ മിസോറാം താരങ്ങള് മുന്നേറ്റം നടത്തിയെങ്കിലും പന്ത് ഗോള് പോസ്റ്റിന് പുറത്തേക്ക് പായുന്ന കാഴ്ചയാണ് കാണാനായത്.
രണ്ടാംപകുതിയുടെ തുടക്കത്തില് ഇരു ടീമുകളും ഒരേപോലെ കളിച്ചെങ്കിലും പിന്നീട് മിസോറാം ആധിപത്യം ഉറപ്പിക്കുകയായിരുന്നു. ഗോള് പോസ്റ്റിന് മുന്നില് വെച്ച് പോലും മിസോറാം താരങ്ങള്ക്ക് ലക്ഷ്യം പിഴച്ചു. കളിയുടെ എഴുപത്തിരണ്ടാം മിനിറ്റില് ബി. സോറാംതാര അടിച്ചു കൊടുത്ത പന്ത് ലാല്ദാംപുയാ തട്ടി ഗോള് വല ചലിപ്പിച്ചതോടെ രണ്ടാംഗോള് മിസോറാം സ്വന്തമാക്കി. തുടര്ന്ന് പശ്ചിമബംഗാള് താരങ്ങള് മുന്നേറ്റം നടത്താന് ശ്രമിച്ചെങ്കിലും മിസോറാം താരങ്ങള് അതെല്ലാം വിഫലമാക്കി.
ഇന്ന് കോര്പ്പറേഷന് സ്റ്റേഡിയത്തില് വൈകിട്ട് നാലിന് നടക്കുന്ന മത്സരത്തില് മഹാരാഷ്ട്രയും ഗോവയും തമ്മിലും രാത്രി ഏഴിന് നടക്കുന്ന മത്സരത്തില് കേരളവും തമിഴ്നാടും തമ്മില് ഏറ്റുമുട്ടും. ആദ്യ കളികളില് വിജയിച്ചാണ് കേരളവും ഗോവയും രണ്ടാംമത്സരത്തിനിറങ്ങുന്നത്.
രണ്ടാംദിവസമായ ഇന്നലെ കോഴിക്കോട് ബീച്ചില് നടന്ന ബീച്ച് വോളി മത്സരത്തില് പുരുഷന്മാരുടെ വിഭാഗത്തില് കേരളം ക്വാര്ട്ടര് ഫൈനലില് പ്രവേശിച്ചു. ഉത്തരാഖണ്ഡിനെ പരാജയപ്പെടുത്തിയാണ് കേരള താരങ്ങള് ക്വാര്ട്ടര് ഫൈനലിലെത്തിയത്. കേരളത്തിനുവേണ്ടി സുനില്കുമാര്, അബ്ദുള് റഹീം എന്നിവരാണ് കോര്ട്ടില് ഇറങ്ങിയത്.
