ജക്കാര്ത്ത: കുത്തനെ ഉയരാന് ശ്രമിച്ചതാണ് എയര് ഏഷ്യാ വിമാനപകടത്തിന് കാരണമെന്ന് റിപ്പോര്ട്ട്. കണ്ട്രോള് ടവറില് ലഭിച്ച വിവരങ്ങളാണ് ദുരന്ത കാരണത്തെക്കുറിച്ച് പുതിയ സൂചന നല്കുന്നത്. എയര്ബസ് എ 320 വിമാനങ്ങള്ക്ക് അനുവദിച്ചതിലും കൂടിയ ഉയരത്തിലേക്ക് വിമാനം പെട്ടെന്ന് ഉയര്ത്തിയതായി സംശയിക്കുന്നുവെന്ന് അന്വേഷണ സമിതി ഉദ്യോഗസ്ഥന് പറയുന്നു.
32,000 അടി ഉയരത്തിലായിരുന്ന വിമാനം 38,000 അടിയിലേക്ക് ഉയര്ത്താനാണ് അനുമതി തേടിയിരുന്നത്. ഇതുപക്ഷേ, രണ്ടു മിനിറ്റ് കഴിഞ്ഞ് 2000 അടി ഉയര്ത്താന് അനുമതി നല്കിയിരുന്നു. അതിനുമുമ്പുതന്നെ വിമാനം അനുവദിക്കാവുന്നതിലും ഏറെ ഉയരത്തിലേക്ക് പറത്തിയതായാണ് സംശയം. മോശം കാലാവസ്ഥയെ തുടര്ന്ന് നിര്ബന്ധിതമായി ഇങ്ങനെ തീരുമാനമെടുക്കുകയായിരിക്കാമെന്നും സംശയമുണ്ട്.
വിമാനം ഉയര്ത്തുമ്പോള് മതിയായ വേഗമില്ലാത്തതിനാല് എന്ജിന് നിലച്ചതാണോയെന്ന സംശയവും വിദഗ്ധര്ക്കുണ്ട്. ബുധനാഴ്ച കണ്ടത്തെിയ മൃതദേഹങ്ങള് പൂര്ണമായി വസ്ത്രമണിഞ്ഞ നിലയിലായിരുന്നു. വിമാനം കേടുപാടുകള് കൂടാതെയാണ് കടലില് പതിച്ചതെന്നതിന് തെളിവാണിതെന്ന് ബന്ധപ്പെട്ടവര് സൂചിപ്പിക്കുന്നു എന്നാല് ഇക്കാര്യത്തില് എന്തെങ്കിലും സത്യാവസ്ഥ ഉണ്ടോയെന്ന് അറിയില്ലെന്ന് കമ്പനി ഉടമ ടോണി ഫെര്ണാണ്ടസ് പറഞ്ഞു.
