ഇസ്ലാമബാദ്:ഭീകരപ്രവര്‍ത്തനങ്ങള്‍ക്കെതിരെയുള്ള നടപടികള്‍ ശക്തമാക്കുന്നതിന്റെ ഭാഗമായി 500 ഭീകരരെ വധിക്കാന്‍ പാക്ഭരണകൂടം ഉത്തരവിട്ടു. വരുംആഴ്ചകളില്‍ ഇവരുടെ വധശിക്ഷ നടപ്പിലാക്കാനാണ് തീരുമാനിച്ചിരിക്കുന്നത്. ഇതിനോടനുബന്ധിച്ച് വധശിക്ഷനിരോധന നിയമം പാക്പധാനമന്ത്രി നവാസ് ഷെരീഫ് എടുത്തുമാറ്റി.
അടുത്തിടെ പെഷവാറിലെ സൈനികസ്‌കൂളിലെ ഭീകരാക്രമണത്തെ തുടര്‍ന്നാണ് ഭീകരര്‍ക്കതിരെയുള്ള സൈനിക നടപടി ശക്തമാക്കുന്നത്. വിവിധകേസുകളിലായി 500ഓളം ഭീകരര്‍ പാക്കിസ്ഥാനില്‍ തടവുശിക്ഷ അനുഭവിക്കുന്നുണ്ടെന്നാണ് കണക്കുകള്‍ സൂചിപ്പിക്കുന്നത്. ഇവരെയാണ് വരുംആഴ്ചകളില്‍ തൂക്കിലേറ്റാന്‍ വിധിച്ചിരിക്കുന്നത്.
അതിനിടെ വധശിക്ഷ റദ്ദാക്കണമെന്നാവശ്യപ്പെട്ട് ഭീകരര്‍ സമര്‍പ്പിച്ച ദയാഹര്‍ജി പാക് പ്രസിഡന്റ് റദ്ദാക്കി. ഭീകരാക്രമണവുമായി ബന്ധപ്പെട്ട് പാക്‌സേന നടത്തിയ തെരച്ചിലില്‍ ഭീകരര്‍ എന്നുസംശയിക്കുന്ന ഒട്ടനവധിയാളുകളെ പോലീസ് അറസ്റ്റ് ചെയ്തിട്ടുണ്ട്. ഇവര്‍ വിചാരണ നേരിട്ടുകൊണ്ടിരിക്കുകയാണ്.
അതേസമയം,പാക്കിസ്ഥാനില്‍ മറ്റൊരുഭീകരാക്രമണത്തിന് ആസൂത്രണം ചെയ്യുന്നതായി ഇന്റലിജെന്‍സ് റിപ്പോര്‍ട്ട് ചെയ്തതായി പാക്കിസ്ഥാന്‍ മന്ത്രി ചൗധരി നിസാര്‍ അലിഖാന്‍ അറിയിച്ചു. ഇതിനെതുടര്‍ന്ന് രാജ്യത്തെ വിവിധ വിമാനത്താവളങ്ങളിലേയും ജയിലുകളിലേയും സുരക്ഷ ശക്തമാക്കിയതായും ഖാന്‍ അറിയിച്ചു. കഴിഞ്ഞദിവസം പെഷവാറിലുണ്ടായ ആക്രമണം സെപ്തംബര്‍ 11 ആക്രമണത്തിന്റെ ചെറിയ പതിപ്പായിരുന്നെന്നും ഖാന്‍ പറഞ്ഞു. അതേസമയം, വധശിക്ഷ നിരോധനനിയമം നീക്കിക്കൊണ്ടുള്ള സര്‍ക്കാര്‍ ഉത്തരവിനെതിരെ മനുഷ്യാവകാശ പ്രവര്‍ത്തകര്‍ രംഗത്തുവന്നിട്ടുണ്ട്.
