കോതമംഗലം: കോതമംഗലത്തെ രണ്ട് കൊലപാതകങ്ങള് സംബന്ധിച്ച ക്രൈംബ്രാഞ്ച് അന്വേഷണം പുതിയ വഴിതിരിവിലേക്ക്. 2009 മാര്ച്ച് 11-ന് ചെറുവട്ടൂരിലെ അംഗന്വാടി ടീച്ചറായിരുന്ന സിനിയുടെ കൊലപാതകവും 2012 ആഗസ്റ്റ് 8-ന് നടന്ന മാതിരപ്പിള്ളി ഷോജിവധവും നടത്തിയ കുറ്റവാളിയുടെ നീക്കങ്ങള് സമാനമാണെന്നാണ് കേസ് അന്വേഷിക്കുന്ന ക്രൈം ബ്രാഞ്ച് സംഘത്തിന്റെ കണ്ടെത്തല്.
കൊലപാതകം നടത്തി ആഭരണങ്ങള് കവര്ന്നെടുക്കുകയെന്ന ലക്ഷ്യത്തിലാണ് രണ്ട് കൊലപാതകങ്ങളും നടത്തിയതെന്നും ഈ രണ്ട് കൊലപാതകങ്ങള്ക്കും സമാനമായ മറ്റ് രണ്ട് കൊലപാതകങ്ങളും നടത്തിയിട്ടുണ്ടെന്നുമാണ് സംഘത്തിന്റെ നിഗമനം. കൊല നടത്തി നാട്ടില് നിന്നും കടന്നുകളഞ്ഞയാളെ സംബന്ധിച്ച സൂചനകള് അന്വേഷണസംഘത്തിന് ലഭിച്ചിട്ടുണ്ട്.
2009 മാര്ച്ച് 11-നാണ് ചെറുവട്ടൂര് കൊല്ലം മോളത്ത് ബിജുവിന്റെ ഭാര്യയും അംഗന്വാടി അദ്ധ്യാപികയുമായിരുന്ന സിനിയെ വീടിനടുത്തുള്ള തോട്ടില് കുളിക്കുന്നതിനിടെ കൊലചെയ്യപ്പെട്ട് തോട്ടിലെ പൊത്തില് മൃതദേഹം ഒളിപ്പിച്ച നിലയില് കണ്ടെത്തിയത്. 2012 ആഗസ്റ്റ് 8-നാണ് മാതിരപ്പിള്ളി വിളയാല് കണ്ണാടിപ്പാറ ഷാജിയുടെ ഭാര്യ ഷോജി വീടിനകത്ത് കഴുത്തറുത്ത് കൊലചെയ്യപ്പെട്ട നിലയില് കണ്ടെത്തിയത്. ഇരു കൊലപാതകങ്ങള്ക്ക് സംഭവസ്ഥലത്ത് യാതൊരുവിധ തെളിവുകളും അവശേഷിച്ചിരുന്നില്ല.
ഷോജിയുടെ കൊലപാതക സ്ഥലത്ത് സംശയാസ്പദമായ നിലയില് കണ്ടെത്തിയ ബൈക്കിനെ കേന്ദ്രീകരിച്ച് നടത്തിയ നിരീക്ഷണമാണ് അന്വേഷണസംഘത്തെ ഈ നിഗമനത്തിലെത്താന് സഹായകമായത്. ഇതേ ബൈക്ക് തന്നെ സിനിയുടെ കൊലപാതകസമയത്തും കൊല നടന്ന പരിസരങ്ങളില് സംശയാസ്പദമായ നിലയില് കണ്ടെത്തിയിരുന്നു. കെഎല് 17 എ 5640 എന്ന നമ്പറിലുള്ള ചുവന്ന നിറത്തിലുള്ള സുസൂക്കി മാക്സ് 100 എന്ന ബൈക്കിനെ ചുറ്റിപ്പറ്റിയാണ് അന്വേഷണം പുരോഗമിക്കുന്നത്.
മരണമടഞ്ഞ കുട്ടമ്പുഴ സ്വദേശിയുടെ പേരിലുള്ള ബൈക്ക് കൈമാറ്റം ചെയ്തശേഷം ഉടമമാറിയതിനാല് ഇപ്പോള് ആരുടെ പേരിലാണെന്ന് കണ്ടെത്താന് കഴിഞ്ഞിട്ടില്ല. ഈ ബൈക്കിന്റെ ഇന്ഷ്വറന്സ് 2012-ന് ശേഷം പുതുക്കിയിട്ടില്ല. ബൈക്കിനെ സംബന്ധിച്ച് എന്തെങ്കിലും വിവരം ലഭിക്കുന്നവര് 9497990207, 0484-2778238 എന്നി നമ്പറുകളില് ബന്ധപ്പെടണമെന്ന് കേസ് അന്വേഷണ ചുമതലയുള്ള ക്രൈംബ്രാഞ്ച് ഡിവൈഎസ്പി ബിജു. കെ. സ്റ്റീഫന് അറിയിച്ചു.
