മയ്യില്‍: നാറാത്ത് മേഖലയില്‍ സിപിഎം അക്രമത്തിന് കോപ്പുകൂട്ടുന്നു. കഴിഞ്ഞദിവസം നാറാത്ത് ടൗണിന് സമീപത്തും ഓണപ്പറമ്പിലും സിപിഎമ്മുകാര്‍ ബിജെപി പ്രവര്‍ത്തകര്‍ക്ക് നേരെ അക്രമമഴിച്ചുവിട്ടു. ശബരിമല ക്ഷേത്രദര്‍ശനത്തിനായി വ്രതമെടുത്ത ബിജെപി പ്രവര്‍ത്തകന്‍ ഉത്തമന്റെ മകന്‍ അഖിലിനെ(23) സിപിഎം സംഘം അക്രമിച്ച് പരിക്കേല്‍പ്പിച്ചു.
നാറാത്ത് ബിജെപി നിയന്ത്രണത്തിലുള്ള ഭാരതീയ സാംസ്‌കാരിക സമിതി വായനശാലയില്‍ കഴിഞ്ഞദിവസം ഒരുസംഘം സിപിഎമ്മുകാര്‍ നായ്‌ക്കുരണപ്പൊടി വിതറിയിരുന്നു. ഇതറിയാതെ ഇവിടെയെത്തിയ ഏതാനും കുട്ടികള്‍ക്ക് അസ്വസ്ഥത അനുഭവപ്പെട്ടിരുന്നു. തുടര്‍ന്ന് കുട്ടികളെ മയ്യില്‍ പിഎച്ച്‌സിയില്‍ പ്രവേശിപ്പിച്ചു.
ഈ മേഖലയില്‍ സംഘപരിവാര്‍ സംഘടനകള്‍ സ്ഥാപിച്ച പ്രചരണ ബോര്‍ഡുകളും കൊടിതോരണങ്ങളും മറ്റും വ്യാപകമായി സിപിഎം സംഘം നശിപ്പിച്ചിരുന്നു. കഴിഞ്ഞദിവസം ബിജെപി നേതാവ് കെ.എന്‍.മുകുന്ദന്റെ വീട്ടില്‍ ഒരുസംഘം സിപിഎമ്മുകാര്‍ റീത്ത് വെക്കുകയും മുകുന്ദനെ ഭീഷണിപ്പെടുത്തുകയും ചെയ്ത സംഭവവും ഉണ്ടായിരുന്നു.
തികച്ചും സമാധാനന്തരീക്ഷം നിലനില്‍ക്കുന്ന ഈ പ്രദേശത്ത് അക്രമത്തിന് സിപിഎം കോപ്പുകൂട്ടുകയാണ്. മയ്യില്‍, നാറാത്ത് മേഖലയില്‍ നിന്നും നിരവധി സിപിഎമ്മുകാര്‍ കൂട്ടത്തോടെ സംഘപരിവാര്‍ സംഘടനകളിലേക്ക് വന്നുകൊണ്ടിരിക്കുകയാണ്. തങ്ങളുടെ ശക്തികേന്ദ്രത്തില്‍ നിന്നും യുവാക്കള്‍ കൂട്ടത്തോടെ കൊഴിഞ്ഞുപോയിക്കൊണ്ടിരിക്കുന്നത് സിപിഎമ്മിനെ വിറളി പിടിപ്പിച്ചിട്ടുണ്ട്. ഇതിന് തടയിടാന്‍ വ്യാപക അക്രമത്തിന് കോപ്പുകൂട്ടുന്നതായാണ് പരാതി.
